వయసు ఒక సంఖ్య మాత్రమేనని మరోసారి నిరూపించింది టాలీవుడ్ సీనియర్ నటి ప్రగతి. నటనతో ఇప్పటికే కోట్లాది ప్రేక్షకుల హృదయాలను గెలుచుకున్న ఆమె, ఇప్పుడు క్రీడా ప్రపంచంలోనూ భారత దేశానికి గర్వకారణంగా మారింది. టర్కీలో జరిగిన ఏషియన్ ఓపెన్ మాస్టర్స్ పవర్లిఫ్టింగ్ ఛాంపియన్షిప్–2025 లో భారత్ తరపున పోటీ పడి, ఒక్కసారిగా నాలుగు పతకాలు సాధించి అందరి దృష్టిని తనవైపు తిప్పుకుంది.
డెడ్లిఫ్ట్ విభాగంలో స్వర్ణ పతకాన్ని కైవసం చేసుకున్న ప్రగతి, బెంచ్ ప్రెస్, స్క్వాట్, ఓవరాల్ విభాగాల్లో మూడు రజత పతకాలతో మెరిసింది. 49 ఏళ్ల వయసులో అంతర్జాతీయ స్థాయిలో ఈ స్థాయి ప్రదర్శన చేయడం ఆమె అసాధారణమైన పట్టుదలకి, క్రమశిక్షణకు అద్దం పడుతుంది. యువతే కాదు, మధ్య వయసు దాటిన మహిళలకు కూడా ఈ విజయం ఒక కొత్త ధైర్యాన్ని నింపుతోంది.
పవర్లిఫ్టింగ్ ప్రస్థానం ఆమెకు 2023లో మొదలైంది. హైదరాబాద్ జిల్లా స్థాయి పోటీలతో ప్రారంభమైన ప్రయాణం.. తెలంగాణ రాష్ట్ర, జాతీయ, దక్షిణ భారత స్థాయి పోటీల వరకు వేగంగా విస్తరించింది. కేరళ, బెంగళూరుల్లో జరిగిన జాతీయ పోటీల్లో స్వర్ణాలు సాధించగా, 2024లో జరిగిన సౌత్ ఇండియన్ ఛాంపియన్షిప్లో రజత పతకం గెలిచి తన స్థాయిని చాటి చెప్పింది. ఈ విజయాలే ఆమెకు అంతర్జాతీయ వేదికపై భారత్ తరపున పోటీ పడే అవకాశం కల్పించాయి.
నటి ప్రగతి సినిమాల్లో కనిపించే హోమ్లీ పాత్రల వెనక ఇంతటి ఉక్కు శక్తి దాగి ఉందని ఈ విజయం ప్రపంచానికి తెలియజేసింది. బృందావనం, రేసుగుర్రం, బాద్షా వంటి విజయవంతమైన చిత్రాలతో ప్రేక్షకుల మన్ననలు పొందిన ఆమె, నటనతో బిజీగా ఉన్నా ఫిట్నెస్ను ఎప్పుడూ నిర్లక్ష్యం చేయలేదు. అదే క్రమశిక్షణ ఇప్పుడు ఆమెను పవర్లిఫ్టింగ్ ఛాంపియన్గా నిలిపింది. సోషల్ మీడియాలో ఆమె షేర్ చేసే వర్కౌట్ వీడియోలు ఇప్పటికే ఎంతోమందికి స్ఫూర్తిగా మారాయి.
నటన, క్రీడలు రెండింట్లోనూ సమానంగా రాణించడం ప్రతి ఒక్కరూ చేయలేని ఘనత. ప్రగతి చూపించిన ఈ ప్రయాణం వయసు, వృత్తి, పరిస్థితులు ఏవీ కూడా మన లక్ష్యాలకు అడ్డుకావని స్పష్టంగా చెబుతోంది. టర్కీ వేదికపై ఆమె గెలిచిన పతకాలతో పాటు, లక్షల మంది మహిళల మనసుల్లో ధైర్యం అనే కొత్త పతకాన్ని కూడా ఆమె గెలుచుకుంది.