Happy with KGF Chapter 2 : ‘కేజీఎఫ్ చాప్టర్ 2’ ప్రేక్షకుల ముందుకొచ్చింది. అంచనాలు తప్పలేదు.. అంతకు మించి.. అనే స్థాయిలో ‘కేజీఎఫ్ ఛాప్టర్ 2’ మీద ప్రశంసల వర్షం కురుస్తోంది. వసూళ్ళ వర్షం సంగతి సరే సరి. మొత్తంగా ఇండియన్ సినిమా ఈ ‘కేజీఎఫ్ ఛాప్టర్ 2’ని పొగిడేస్తోంది. ‘ఇదీ ఇండియన్ సినిమా..’ అంటున్నారు వివిధ సినీ పరిశ్రమలకు చెందిన ప్రముఖులు.
‘ఓ బాహుబలి.. ఓ ఆర్ఆర్ఆర్.. ఓ కేజీఎఫ్..’ అంటూ సినీ జనం నినదిస్తున్న వేళ ప్రభాస్ అభిమానులు సంబరాల్లో మునిగి తేలుతున్నారు. కారణం అందరికీ తెలిసిందే కదా.? ‘కేజీఎఫ్’ డైరెక్టర్ ప్రశాంత్ నీల్ తదుపరి సినిమా ప్రభాస్తోనే. అదే ‘సలార్’. ‘సలార్’ షూటింగ్ ఇప్పటికే ప్రారంభమయ్యింది కూడా.
ప్రభాస్ అభిమానులు మాత్రమే కాదు, యంగ్ టైగర్ ఎన్టీయార్ అభిమానులు, అలాగే రామ్ చరణ్ అభిమానులూ ‘కేజీఎఫ్ ఛాప్టర్ 2’ సినిమా విజయం పట్ల హర్షం వ్యక్తం చేస్తున్నారు. ప్రభాస్ తర్వాత ఎన్టీయార్తో ప్రశాంత్ నీల్ ఓ సినిమా చేస్తాడు.
చరణ్తో కూడా ప్రశాంత్ నీల్ సినిమా ఒకటుంది.
అయితే, ‘కేజీఎఫ్ ఛాప్టర్ 3’ వస్తుందంటూ ‘కేజీఎఫ్ ఛాప్టర్ 2’లో పేర్కొన్న దరిమిలా, ‘సలార్’ తర్వాత ప్రశాంత్ నీల్ ఏ సినిమాని టేకప్ చేస్తాడన్నది ప్రస్తుతానికైతే సస్పెన్సే.
ప్రబాస్ అభిమానులు మాత్రం, ‘సాహో’, ‘రాధేశ్యామ్’ సినిమాలు కొట్టిన దెబ్బ నుంచి ‘సలార్’ రూపంలో ఉపశమనం లభిస్తుందని భావిస్తున్నారు.