Omicron : ‘వైరస్ మన దగ్గరకు రాదు.. దాని దగ్గరకే మనం వెళుతున్నాం..’ కరోనా వైరస్ మొదటి వేవ్ సందర్భంగా చాలామంది మేధావులు చెప్పిన మాట ఇది. ఎవరన్నా కావాలని ప్రమాదాన్ని కొనితెచ్చుకుంటారా.? విదేశాల నుంచి వచ్చే విమానాల్ని తొలుత ఆపేస్తే, అసలు దేశంలో లాక్ డౌన్ పెట్టాల్సిన అవసరమే లేదని పలువురు నిపుణులు సూచించినా, విదేశీ విమానాల్ని ఆపడం ఆలస్యమయ్యింది. ఫలితం అనుభవించాం.!
సౌతాఫ్రికాలో కొత్త వేరియంట్ వెలుగు చూశాక కూడా అదే పరిస్థితి. విదేశాల నుంచి జనం వస్తూనే వున్నారు.. ఒమిక్రాన్ వేరియంట్ని మోసుకొస్తూనే వున్నారు. అలా మోసుకొచ్చినోళ్ళు, విచ్చలవిడిగా జనంలో తిరిగేస్తున్నారు కూడా. ఎయిర్ పోర్టుల్లో టెస్టులు జరుగుతున్నాయ్.. ఆ టెస్టుల నుంచి కూడా ఒమిక్రాన్ తప్పించుకుంటున్నట్టుంది.
తాజా లెక్క 101. ఈ స్కోర్ చూస్తే ఎవరైనా షాక్ అవ్వాల్సిందే. సింగిల్ డిజిట్ కాస్తా.. ఇప్పుడు ట్రిపుల్ డిజిట్ అయ్యింది. తర్వాతేంటి.? డెల్టా కంటే వేగంగా వ్యాప్తి చెందుతోందని అంటున్నారు ఒమిక్రాన్ వేరియంట్ గురించి చెబుతూ వైద్య నిపుణులు.
కేంద్ర వైద్య ఆరోగ్య శాఖ తాజాగా ఓ హెచ్చరిక చేసింది. అనవసర ప్రయాణాలొద్దు.. ఎక్కువమంది గుమికూడే చోటకి వెళ్ళొద్దు.. అన్నది ఆ హెచ్చరిక సారాంశం. పర్యాటక ప్రాంతాలు తెరిచారు.. పెళ్ళిళ్ళు.. ఇతర శుభకార్యాలకు అనుమతులిచ్చారు. రాజకీయ పరమైన కార్యక్రమాల్లో జనాన్ని భాగం చేస్తున్నారు.
అన్నిటికీ అనుమతులు ఇచ్చేసి, ఎక్కడికీ వెళ్లొద్దంటే ఎలా.? ధూమపానం ఆరోగ్యానికి హానికరం.. కానీ, దేశంలో సిగరెట్లు, ఇతర పొగాకు ఉత్పత్తుల్ని విక్రయిస్తుంటారు. ఇది కూడా అలాంటిదేనేమో. మీ ఖర్మకి మీరు చావండి.. అన్నట్టుంది ఒమిక్రాన్ వేరియంట్ విషయంలో.