మహిళల వన్డే వరల్డ్ కప్ 2025లో టీమిండియా మరోసారి తడబాటు ప్రదర్శించింది. ఆదివారం ఇంగ్లాండ్తో జరిగిన ఉత్కంఠ భరిత మ్యాచ్లో హర్మన్ప్రీత్ కౌర్ నేతృత్వంలోని భారత జట్టు గెలుపు అంచుల వరకూ వెళ్లి చివర్లో నాలుగు పరుగుల తేడాతో ఓటమి పాలైంది. టోర్నమెంట్ ఆరంభంలో ధాటిగా ఆడిన టీమిండియా.. ఇప్పుడు వరుస పరాజయాలతో ఒత్తిడిలోకి వెళ్లింది.
ఈ మ్యాచ్ లో టాస్ గెలిచి మొదట బ్యాటింగ్ చేసిన ఇంగ్లాండ్ జట్టు 50 ఓవర్లలో 8 వికెట్ల నష్టానికి 288 పరుగులు చేసింది. ఇక ఆ లక్ష్యఛేదనలో భారత్ ఆత్మవిశ్వాసంగా ఆరంభించినా.. చివర్లో మాత్రం ఒత్తిడిని తట్టుకోలేకపోయింది. ఓపెనర్ స్మృతి మంధాన అద్భుతమైన 88 పరుగులతో జట్టుకు బలమైన ప్రారంభం ఇచ్చింది. కెప్టెన్ హర్మన్ప్రీత్ కౌర్ 70 పరుగులతో సత్తా చాటగా, దీప్తి శర్మ 50 పరుగులు చేసి జట్టును చివరి వరకూ పోరాడించారు. కానీ చివరి ఓవర్లలో ఇంగ్లాండ్ బౌలర్ల ప్రెషర్ బౌలింగ్ కారణంగా భారత్ గమ్యానికి నాలుగు పరుగుల దూరంలో ఆగిపోయింది.
ఈ మ్యాచ్తో భారత్కు వరల్డ్ కప్ 2025లో ఇది వరుసగా మూడో ఓటమి కావడం ఆందోళన కలిగిస్తోంది. టోర్నమెంట్ ప్రారంభంలో రెండు విజయాలు సాధించిన హర్మన్ సేన.. ఇప్పుడు పాయింట్ల పట్టికలో వెనుకబడి ప్లేఆఫ్ అవకాశాలను ప్రమాదంలోకి నెట్టుకుంది. మ్యాచ్ అనంతరం కెప్టెన్ హర్మన్ప్రీత్ మాట్లాడుతూ.. గెలుపు చాలా దగ్గరగా వచ్చింది కానీ చివరి క్షణాల్లో అవకాశాలు చేజారిపోయాయి. బౌలింగ్, ఫీల్డింగ్లో కొన్ని చిన్న తప్పిదాలు పెద్దవిగా మారాయి. ఇకపై ప్రతి మ్యాచ్ను ‘డూ ఆర్ డై’గా తీసుకుంటాం అని తెలిపారు.
వరుస పరాజయాల నేపథ్యంలో టీమిండియా ఇప్పుడు మిగిలిన మ్యాచ్ల్లో గెలవడం తప్ప మరో మార్గం లేదు. ప్లేఆఫ్ రేసులో నిలవాలంటే ప్రతి రన్కి పోరాడాల్సిన పరిస్థితి ఏర్పడింది. అభిమానులు జట్టుపై నమ్మకం ఉంచి ప్రోత్సాహం అందిస్తున్నారు.