ఆస్ట్రేలియాతో జరుగుతున్న నాలుగో టెస్టులో భారత స్టార్ బ్యాటర్ రిషబ్ పంత్ చేసిన షాట్ క్రికెట్ ప్రపంచంలో హాట్ టాపిక్గా మారింది. మూడో రోజు ఆటలో, ఆస్ట్రేలియా పేసర్ బోలాండ్ బౌలింగ్లో పంత్ ఫైన్ లెగ్ దిశగా స్కూప్ షాట్ ఆడే ప్రయత్నం చేసి తను ఔటవ్వడమే కాదు, జట్టును మరింత క్లిష్ట పరిస్థితిలోకి నెట్టాడు. దీనిపై భారత క్రికెట్ దిగ్గజం సునీల్ గవాస్కర్ తీవ్ర అసహనంతో స్పందించారు.
గవాస్కర్ లైవ్ కామెంటరీలో ‘‘స్టుపిడ్.. స్టుపిడ్.. స్టుపిడ్’’ అంటూ పంత్ నిర్ణయాన్ని తప్పుబట్టారు. ‘‘ఇలాంటి షాట్ ఆడే స్థితిలో భారత జట్టు లేదు. జట్టు పరిస్థితిని అర్థం చేసుకొని ఆడాలి. ఇది టెస్ట్ క్రికెట్, టీ20 కాదు’’ అంటూ గవాస్కర్ ఘాటుగా వ్యాఖ్యానించారు. పంత్ షాట్ ఎంపిక జట్టుకు పెద్ద నష్టాన్ని కలిగించిందని, టెస్టుల్లో బాధ్యతతో ఆడటం ఎంత ముఖ్యమో గుర్తు చేశారు. ఇది గవాస్కర్ మొదటిసారి పంత్ను విమర్శించడం కాదు. 2022లో కూడా దక్షిణాఫ్రికాతో మ్యాచ్లో పంత్ షాట్ ఎంపికపై గవాస్కర్ అసహనం వ్యక్తం చేశారు.
పంత్ ఔట్ కావడంతో భారత జట్టు మరింత ఇబ్బందుల్లో పడింది. ఇప్పటికే కష్టాల్లో ఉన్న జట్టుకు ఇది పెద్ద ఎదురుదెబ్బగా మారింది. ఆసీస్ జట్టు తమ ఆధిపత్యాన్ని బలపరుచుకుంది. పంత్ ఆడిన షాట్ జట్టుకు పెద్ద నష్టాన్ని తెచ్చిపెట్టిందని క్రికెట్ విశ్లేషకులు పేర్కొన్నారు. టెస్టు క్రికెట్లో ప్రతీ వికెట్ కీలకమని, ఇలాంటి నిర్లక్ష్య నిర్ణయాలు జట్టు మొత్తానికీ ప్రభావం చూపుతాయని వారు అభిప్రాయపడ్డారు. ఈ ఘటనపై అభిమానులు భిన్నాభిప్రాయాలు వ్యక్తం చేస్తున్నారు. కొంతమంది పంత్ ధైర్యవంతమైన ఆటను సమర్థిస్తుండగా, మరికొందరు అతని నిర్లక్ష్యమైన షాట్ ఎంపికను తప్పుపడుతున్నారు. అలాగే టెస్టు క్రికెట్లో పరిస్థితిని బట్టి ఆడాల్సిన అవసరం ఉందని విశ్లేషకులు అంటున్నారు. పంత్ వంటి ప్రతిభావంతుడైన ఆటగాడు భవిష్యత్తులో ఇలాంటి తప్పిదాలు చేయకుండా జాగ్రత్తపడాలని సలహా ఇస్తున్నారు.