తెలంగాణ జవాన్ కర్నల్ సంతోష్ బాబు కథను సిల్వర్ స్క్రీన్ పై చూపించేందుకు బాలీవుడ్ టీమ్ సిద్ధమవుతోంది. 2020లో గల్వాన్ లోయలో దేశ రక్షణ కోసం తన ప్రాణాలను అర్పించిన ఈ వీరుడి జీవితాన్ని బాలీవుడ్ పటిష్టంగా సినిమాగా మలచే ప్రణాళికలో ఉంది. దేశం పట్ల వీరత్వాన్ని, నాయకత్వాన్ని చూపించిన సంతోష్ బాబు జీవితగాథను ఆధారంగా తీసుకుని ఒక భావోద్వేగ చిత్రం రూపొందుతోంది.
ఈ సినిమాలో బాలీవుడ్ టాప్ స్టార్ సల్మాన్ ఖాన్ సంతోష్ పాత్రను పోషించబోతున్నట్లు ముంబయి ఫిల్మ్ వర్గాలు వెల్లడి చేస్తున్నాయి. ‘ఇండియాస్ మోస్ట్ ఫియర్‌లెస్ 3’ పుస్తకంలో రాసిన కథ ఆధారంగా స్క్రిప్ట్ రూపుదిద్దుకుంటోంది. సురేష్ నాయర్, చింతన్ గాంధీ స్క్రీన్‌ప్లే రాస్తుండగా, అపూర్వా లాఖియా దర్శకుడిగా బాధ్యతలు చేపట్టనున్నాడు. జూలై నుంచి 70 రోజుల షెడ్యూల్‌తో షూటింగ్ పూర్తిచేయాలన్నది మేకర్స్ లక్ష్యం. సల్మాన్ ఇప్పటికే ఆర్మీ క్యారెక్టర్‌కి అనుగుణంగా శిక్షణలు ప్రారంభించారట.
సంతోష్ బాబు కుటుంబం ఈ చిత్రంపై సానుకూలంగా స్పందించింది. తమ బిడ్డ త్యాగాన్ని దేశం మొత్తం తెలుసుకోవాలనే ఉద్దేశంతో ఇది జరుగుతుండటమే గొప్ప విషయమని వారు తెలిపారు. బాలీవుడ్‌లో వచ్చిన అన్ని ఆర్మీ బయోపిక్‌లలో ఈ కథకున్న మానసిక బలానికీ, భావోద్వేగానికి ఓ ప్రత్యేక స్థానం ఉంటుందనడంలో సందేహమే లేదు. దేశానికి అసలైన వీరులైన వారి జీవితాలను తెరమీదకి తేవడమే నిజమైన గౌరవం.