బిగ్ బాస్.. ప్రస్తుతం తెలుగు రాష్ట్రాల్లో దీని గురించే చర్చ. ఇదే ఫీవర్ పట్టుకుంది జనాలకు. ఎక్కడ చూసినా బిగ్ బాస్ 4వ సీజన్ గురించే చర్చ. ఈ షో ప్రారంభంలో కాస్త అటూఇటూ ఉన్నా… రెండు వారాల్లో పుంజుకున్నది షో. ప్రస్తుతం టాప్ రేటింగ్స్ దక్కించుకుంటూ ప్రేక్షకులను కూడా అలరిస్తోంది బిగ్ బాస్ షో.
ఈ షోకు మరో ప్లస్ పాయింట్ వీకెండ్ ఎపిసోడ్స్. వీకెండ్ ఎపిసోడ్స్ కోసం తెలుగు ప్రేక్షకులు ఎంతో ఆతృతగా ఎదురు చూస్తున్నారు. ముఖ్యంగా హోస్ట్ గా నాగార్జున వ్యవహరించే తీరు చూసి హౌస్ మేట్స్ తో పాటు జనాలు కూడా ముచ్చట పడుతున్నారు.
అయితే.. ప్రస్తుతం నాగార్జున మనాలిలో వైల్డ్ డాగ్ సినిమా షూటింగ్ లో బిజీగా ఉన్నారు. కేవలం వీకెండ్ ఎపిసోడ్స్ కోసం హైదరాబాద్ వచ్చి వెళ్తున్నారు. ప్రతి వారం కేవలం బిగ్ బాస్ వీకెండ్ ఎపిసోడ్స్ కోసం హైదరాబాద్ రావడం చాలా కష్టంగా ఉందట. అందులోనూ కరోనా సమయం కదా. ఎందుకు లేనిపోని సమస్య అని ఈ వారం వేరే హోస్ట్ ను తీసుకోవాలని బిగ్ బాస్ యాజమాన్యం యోచిస్తోందట.
నిజానికి గత వారమే వేరే హోస్ట్ రావాల్సింది కానీ.. గత వారం నాగార్జునతోనే ఎలాగోలా సెట్ చేశారు. ఈసారి మాత్రం ఖచ్చితంగా నాగార్జున హోస్ట్ చేసే అవకాశం లేకపోవడంతో తప్పేది లేక ఎవరిని తీసుకోవాలన్న మీమాంసలో బిగ్ బాస్ నిర్వాహకులు ఉన్నట్టు తెలుస్తోంది.
అయితే.. గత సీజన్ లో కూడా నాగార్జున బదులు కొన్ని వీకెండ్ షోలలో రమ్యకృష్ణ హోస్ట్ చేసింది. తను కూడా బాగానే ప్రేక్షకులను మెప్పించింది. అయితే.. ఈసారి రమ్యకృష్ణ బదులు వేరే కొత్త సెలబ్రిటీని తీసుకురావాలని బిగ్ బాస్ నిర్వాహకులు యోచిస్తున్నారట.
దీంతో వాళ్లకు కనిపించిన ఒకే ఒక వ్యక్తి జబర్దస్త్ రోజా. రోజాకు ప్రస్తుతం పాపులారిటీ బాగానే ఉన్నది. ఓవైపు రాజకీయాల్లో బిజీగా ఉంటూనే.. మరోవైపు టీవీ షోల్లో పాల్గొంటోంది. జబర్దస్త్ కు కూడా ఆమె జడ్జిగా పనిచేస్తోంది. మరికొన్ని ప్రోగ్రామ్ లలోనూ పాల్గొంటోంది. బుల్లితెర ప్రేక్షకులకు రోజా బాగా పరిచయం. ఈనేపథ్యంలో రోజాను ఈ వారం వీకెండ్ షోలకు హోస్ట్ గా తీసుకురావాలని బిగ్ బాస్ నిర్వాహకులు అనుకుంటున్నారట.
ఒకవేళ ఈ వారం హోస్ట్ గా రోజా వచ్చి.. నాగార్జునను డామినేట్ చేస్తుందా? ఎలా హోస్ట్ చేస్తుంది? కంటెస్టెంట్లను ఎలా హ్యాండిల్ చేస్తుంది? అనే విషయాలు తెలియాలంటే ఈ వీకెండ్ కోసం వెయిట్ చేయాల్సిందే.