పెళ్లి సందడి సినిమాతో టాలీవుడ్ కి పరిచయమైన యంగ్ టాలెంటెడ్ హీరోయిన్ శ్రీ లీల ఆ సినిమా సూపర్ హిట్ కావడంతో ఓవర్ నైట్ స్టార్ అయిపోయింది. వరుసగా స్టార్ హీరోలతో సినిమాలు చేసింది. మహేష్ బాబు సరసన గుంటూరు కారం, భగవంత్ కేసరి సినిమాలో బాలయ్య కూతురుగా నటించి మెప్పించింది. ఇప్పుడు ఈ డాన్సింగ్ క్వీన్ పై కోలీవుడ్ కన్ను పడింది.
ఆమెని తమ సినిమాలలో నటింపజేయాలని ఎంతగానో ప్రయత్నిస్తున్నారు అక్కడ దర్శక, నిర్మాతలు. మొన్న విజయ్ హీరోగా వచ్చిన ద గోట్ సినిమాలో శ్రీ లీలకి స్పెషల్ సాంగ్ చేసే ఛాన్స్ వచ్చింది. అయితే తమిళంలో హీరోయిన్ గానే ఎంట్రీ ఇవ్వాలనుకున్న శ్రీ లీల ఈ సాంగ్ ని రిజెక్ట్ చేసినట్లు సమాచారం. అయితే ఇప్పుడు పుష్ప 2 సినిమాలో స్పెషల్ సాంగ్ చేసి అందరి దృష్టిని ఆకర్షించింది. మొన్న చెన్నైలో జరిగిన పుష్ప 2 ఈవెంట్ లో తమిళంలో మాట్లాడి అందరినీ ఆశ్చర్యానికి గురి చేసింది.
అయితే పుష్ప 2 సాంగ్ ఎఫెక్ట్ శ్రీలీల కెరియర్ పై బాగానే పనిచేసినట్లు కనిపిస్తుంది. ఇప్పుడు ఆమెకి తమిళంలో శివ కార్తికేయన్ సరసన నటించే అవకాశం దక్కినట్లు సమాచారం. శివ కార్తికేయన్ హీరోగా ఆకాశమే హద్దురా, గురు వంటి చిత్రాలను తెరకెక్కించిన సుధా కొంగర దర్శకత్వంలో పురాణ నూరు అనే భారీ బడ్జెట్ చిత్రం తెరకెక్కబోతుంది. ఈ సినిమాలో హీరోయిన్ గా శ్రీలీలని ఫిక్స్ చేసినట్లు సమాచారం. అయితే దీనికి సంబంధించిన అధికారిక ప్రకటన ఇంకా రావాల్సి ఉంది.
తమిళ స్టార్ డైరెక్టర్ లోకేష్ కనకరాజ్ ఈ సినిమాలో విలన్ గా నటిస్తున్నట్లు సమాచారం. నిజానికి ఈ సినిమాలో ముందుగా హీరో సూర్య నటించాల్సి ఉంది కానీ ఆయన అనివార్య కారణాల వలన ఈ సినిమా నుంచి తప్పుకున్నట్లు సమాచారం. సూర్య ప్లేస్ లోకి వచ్చిన శివ కార్తికేయన్ ఈ సినిమాతో మరో హిట్ అందుకుంటాడా.. తమిళ తంబిలని శ్రీ లీల ఏ మేరకు ఆకట్టుకుంటుందో వేచి చూడాల్సిందే.