Yuva Rajkumar : కన్నడ కంఠీరవ దివంగత నటుడు రాజ్ కుమార్ వారసత్వంగా ఆయన కుమారులు ఇప్పటికే కన్నడ సినీ పరిశ్రమ లో ఉన్న సంగతి తెలిసిందే. రాజ్ కుమార్ గారికి ముగ్గురు కుమారులు పెద్ద కొడుకు శివ రాజ్‌కుమార్‌, రెండో కొడుకు రాఘవేంద్ర రాజ్‌కుమార్‌, మూడో కొడుకు పునీత్‌ రాజ్‌కుమార్‌ . అయితే ముగ్గురు హీరోలుగా నిర్మాతలుగా సినీ పరిశ్రమలో తమదైనముద్ర వేశారు..పునీత్‌ అకాల మరణాన్ని ఇప్పటికీ ఆయన అభిమానులు జీర్ణించుకోలేకపోతున్నారు.
అయితే ప్రస్తుతం రాఘవేంద్ర రాజ్‌కుమార్‌ తనయుడు యువ రాజ్‌కుమార్‌ హీరోగా తెరంగేట్రం చేస్తున్నాడు. కే జి ఎఫ్ లాంటి సినిమాలు నిర్మించిన హోంబలే ఫిలిమ్స్ ఈ విషయాన్ని తెలియజేస్తూ అతని ఫస్ట్ లుక్‌ను విడుదల చేసింది. ఈ సందర్భంగా రాజ్ కుమార్ కుటుంబంతో తమ అనుబంధాన్ని గుర్తు చేసుకుంది ఈ సంస్థ. కన్నడ కంఠీరవ కుటుంబం నుంచి మూడవ తరం నటుడిని చిత్రపరిశ్రమకు పరిచయం చేయడం తమకు చాలా గర్వంగా ఉందని హోంబలే ఫిలిమ్స్ వారు తెలియజేశారు.
యువ రాజ్ కుమార్ హీరోగా హోంబలే ఫిలిమ్స్ నిర్మిస్తున్న ఈ సినిమా ను ‘రాజకుమార’, ‘మిస్టర్‌ అండ్‌ మిసెస్‌ రామాచారి’ వంటి హిట్‌ చిత్రాలను తెరకెక్కించిన సంతోశ్‌ దర్శకత్వం వహిస్తున్నారు. ఇక ఈ సినిమాకి సంబంధించి విడుదలైన పోస్టర్ లో బ్లాక్‌ అండ్‌ బ్లాక్‌ దుస్తుల్లో కనిపించిన యువ రాజ్‌కుమార్‌ అందరినీ ఆకట్టుకుంటున్నాడు.