Thandel: నాగచైతన్య తాజా చిత్రం తండేల్ తొలి వీకెండ్‌లో మంచి వసూళ్లు సాధించి బిగ్గెస్ట్ ఓపెనర్‌గా నిలిచింది. యూనిట్ వెల్లడించిన వివరాల ప్రకారం, మొదటి మూడు రోజుల్లో ఈ సినిమా ప్రపంచవ్యాప్తంగా 62.37 కోట్ల గ్రాస్‌ను రాబట్టింది. అయితే నిర్మాత బన్నీ వాస్ చెప్పిన 100 కోట్ల మార్కును చేరుకోవాలంటే ఇంకా 37 కోట్ల వసూళ్లు అవసరం. వీకెండ్ తర్వాత వసూళ్లు ఎలా స్థిరపడతాయనేదే ఇప్పుడు ఆసక్తికరమైన అంశం.
ఆంధ్రప్రదేశ్‌లో తొలి వారం టికెట్ ధరలు పెంచుకున్న టీమ్, ఇప్పుడు సాధారణ ధరలకు మారాలని యోచిస్తోంది. సినిమా టాక్ పాజిటివ్‌గా ఉన్నా, దీని స్థాయిని పుష్ప 2 లాంటి భారీ హిట్‌తో పోల్చడం కష్టమే. మాస్ ప్రేక్షకుల మద్దతు ఎంతవరకు కొనసాగుతుందనేది కీలకం. నైజాంలో సినిమా బలంగా ఉంది, ముఖ్యంగా హైదరాబాద్‌లో హౌస్‌ఫుల్ బోర్డులు ఎక్కువగా కనిపిస్తున్నాయి. బుక్ మై షోలో 24 గంటల్లోనే 1.90 లక్షల టికెట్లు అమ్ముడుపోవడం సినిమా బజ్‌ను స్పష్టంగా తెలియజేస్తోంది.
అయితే, తండేల్ ప్యాన్ ఇండియా ప్రమోషన్లు చేసినప్పటికీ ఇతర భాషల్లో ఇంకా పెద్ద ఎఫెక్ట్ చూపించలేదు. హిందీ మార్కెట్‌లో సినిమా పుంజుకోవాల్సిన అవసరం ఉంది. పాకిస్థాన్ జైల్ ఎపిసోడ్ వంటి అంశాలు బాలీవుడ్ ఆడియెన్స్‌కు కొత్తగా అనిపించకపోవచ్చన్న అంచనాలు వినిపిస్తున్నాయి. కానీ సముద్ర నేపథ్యంలో ఉన్న ఎమోషనల్ కంటెంట్‌ను నార్త్ ఆడియన్స్ ఎంతవరకు కనెక్ట్ అవుతారో చూడాలి. ఇక అసలు పరీక్ష సోమవారం నుంచి ప్రారంభమవుతుంది. వీకెండ్ బూస్ట్ తర్వాత వర్కింగ్ డేస్‌లో సినిమా ఆక్యుపెన్సీని ఎలా నిలబెట్టుకుంటుందనేది తండేల్ రన్‌ను నిర్ణయించే అంశం. మౌత్ టాక్ బలంగా ఉంటే 100 కోట్ల మైలురాయిని తేలికగా అందుకునే అవకాశం ఉంది, లేదంటే కాస్త కష్టమవుతుంది.
