కోలీవుడ్ టాలెంటెడ్ హీరో ధనుష్ ప్రధాన పాత్రలో… క్లాస్ మేకింగ్‌కు పేరుగాంచిన శేఖర్ కమ్ముల డైరెక్షన్‌లో తెరకెక్కిన తాజా చిత్రం ‘కుబేర’ జూన్ 20న విడుదలై బ్లాక్‌బస్టర్ టాక్‌తో దూసుకుపోతోంది. రష్మిక మందన్న హీరోయిన్ నటించిన ఈ చిత్రంలో అక్కినేని నాగార్జున కీలక పాత్ర పోషించారు. తమిళం, తెలుగు, హిందీ భాషల్లో ఏకకాలంలో విడుదలైన ఈ సినిమా, మొదటి షో నుంచే ప్రేక్షకులను విశేషంగా ఆకట్టుకుంటోంది.
బిచ్చగాడు పాత్రలో ధనుష్ నటనకు విమర్శకుల నుంచి ప్రశంసలు లభిస్తుండగా, శేఖర్ కమ్ముల చేస్తున్న ఈ డిఫరెంట్ ప్రయత్నం ఎంత గొప్పదో మరోసారి నిరూపితమైంది. తిరుపతి వీధుల్లో బిచ్చం అడుగుతున్న ధనుష్ పాత్రలోని మానవీయత, గాఢత, నటన అంతా కలసి ప్రేక్షకులను ఎమోషనల్ చేయగా, ఇది ఆయన కెరీర్‌లో మరొక ప్రత్యేక విజయంగా నిలిచింది.
అయితే ఈ విజయవంతమైన పాత్ర ముందుగా ధనుష్‌కు కాకుండా టాలీవుడ్ స్టార్ యాక్టర్ విజయ్ దేవరకొండకు ఆఫర్ అయిందని టాక్ హాట్‌గా మారింది. శేఖర్ కమ్ముల.. విజయ్ దేవరకొండల మధ్య ఉన్న స్నేహంతో మొదటగా ఈ క్యారెక్టర్‌ను ఆయనకే ఆఫర్ చేశారని, కానీ బిచ్చగాడి పాత్ర నాకిష్టం లేదు అని చెప్పి ఆయన వదిలేశారట. తాను చేసే రోల్స్‌కు ఇది సరిపడదని వద్దనుకున్నట్లు తెలుస్తోంది.
ఇప్పుడు ఈ రోలులో ధనుష్ నటించి భారీ హిట్ కొట్టిన నేపథ్యంలో, “విజయ్ దేవరకొండ జీవితంలో మిస్ అయిన బంపర్ ఆఫర్ ఇదే కాబోలు” అంటూ నెట్టింట నెటిజన్లు కామెంట్స్ చేస్తున్నారు. ఒక పెద్ద విజయం తన చేతిలోనుంచి జారిపోయిందని అంటున్నారు. అయితే చివరికి ఈ ప్రయోగాత్మక కథను ధనుష్ ఒప్పుకుని ధైర్యంగా పోషించడంతో, ఆ పాత్రకు న్యాయం జరిగిందన్న అభిప్రాయాలు కూడా వినిపిస్తున్నాయి. పాత్రలు ఎలా ఉంటాయన్నదానికన్నా, వాటిని ఎలా సమర్ధవంతంగా పోషించామన్నదే ప్రధానమైనది.