జైపూర్ వేదికగా జరిగిన ఐపీఎల్ 2025 లీగ్ మ్యాచ్‌లో దిల్లీ క్యాపిటల్స్ పంజాబ్ కింగ్స్‌పై 6 వికెట్ల తేడాతో విజయం సాధించింది. ప్లేఆఫ్స్ లో టాప్ ప్లేస్ ను నిలబెట్టుకోవాలంటే తప్పక గెలవాల్సిన మ్యాచ్‌లో పంజాబ్ పరాజయం పాలవ్వడం హాట్ టాపిక్ అయింది. అయితే సీజన్ చివరి మ్యాచ్ అయినప్పటికీ దిల్లీ పోరాట పటిమను మరోసారి నిరూపించింది.
ముందుగా టాస్ ఓడి బ్యాటింగ్‌కు దిగిన పంజాబ్ కింగ్స్ 20 ఓవర్లలో 8 వికెట్ల నష్టానికి 206 పరుగులు చేసింది. కెప్టెన్ శ్రేయస్ అయ్యర్ (53; 34 బంతుల్లో 5 ఫోర్లు, 2 సిక్స్‌లు) అర్ధ శతకం నమోదు చేయగా, చివర్లో మార్కస్ స్టాయినిస్ (44*; 16 బంతుల్లో 3 ఫోర్లు, 4 సిక్స్‌లు) భారీ షాట్లతో స్కోర్‌ను వేగంగా పెంచాడు.
జోష్ ఇంగ్లిస్ (32; 12 బంతుల్లో 3 ఫోర్లు, 2 సిక్స్‌లు), ప్రభ్‌సిమ్రన్ సింగ్ (28), నేహల్ వధేరా (16) వన్నీ తమవంతు పాత్ర పోషించారు. దిల్లీ బౌలర్లలో ముస్తాఫిజుర్ రెహ్మాన్ 3 వికెట్లు, కుల్దీప్ యాదవ్ – విప్రాజ్ నిగమ్ తలో రెండు వికెట్లు, ముకేశ్ కుమార్ ఒక్క వికెట్ తీశారు.
లక్ష్య ఛేదనలో దిల్లీ క్యాపిటల్స్ ఆకట్టుకునే బ్యాటింగ్ ప్రదర్శన చేసింది. ఓపెనర్లు కేఎల్ రాహుల్ (35; 21 బంతుల్లో 6 ఫోర్లు, 1 సిక్స్‌), డుప్లెసిస్ (23; 15 బంతుల్లో 2 ఫోర్లు, 1 సిక్స్‌) శుభారంభం ఇచ్చారు. తర్వాత కరుణ్ నాయర్ (44; 27 బంతుల్లో 5 ఫోర్లు, 2 సిక్స్‌లు), సమీర్ రిజ్వీ (58*; 25 బంతుల్లో 3 ఫోర్లు, 5 సిక్స్‌లు) ధాటిగా ఆడి మ్యాచ్‌ను కట్టిపడేశారు. పంజాబ్ బౌలర్లలో హర్‌ప్రీత్ బ్రార్ 2 వికెట్లు తీయగా, మార్కో యాన్సన్, ప్రవీణ్ దూబే తలో వికెట్ పడగొట్టారు. ఈ ఓటమితో పంజాబ్ ప్లేఆఫ్స్ రేస్‌ టాప్ టేబుల్ లో మరీంత పోటీని ఎదుర్కోనుంది.
