ప్రతిష్టాత్మక టెండూల్కర్‌-అండర్సన్‌ సిరీస్‌లో రెండో మ్యాచ్ కు టీమిండియా సిద్ధమైంది. లీడ్స్‌లో గెలిచే మ్యాచ్‌ను చేజార్చుకున్న టీమ్‌ఇండియా.. ఇంగ్లండ్‌ను ఎడ్జ్‌బాస్టన్‌లో ఓడించి సిరీస్‌లో జోష్‌ అందుకోవాలని చూస్తున్నది. ఇంతకు ముందు ఈ మైదానంలో భారత్ రికార్డులు మాత్రం కాస్త కలవర పెడుతోంది. ఇక్కడ 8 టెస్టులు ఆడితే ఒక్కటిని కూడా గెలవలేదు. ఈసారి చరిత్ర తిరగరాస్తుందా.. అన్నది చూడాలి.
ఈ టెస్టులో స్టార్‌ బౌలర్‌ బుమ్రా ఆడతాడా..? లేదా..? అన్నది ఫ్యాన్స్‌లో పెద్ద చర్చే. బుమ్రా లేకపోతే అర్ష్‌దీప్‌ లేదా ఆకాశ్‌దీప్‌ అవకాశాలు ఉండనున్నాయి. పేస్‌ దళానికి జోడింపు కుదరనప్పుడు స్పిన్‌ విభాగంలో జడేజా తప్పనిసరి. ఆయనతో పాటు కుల్దీప్‌ లేదా వాషింగ్టన్‌ సుందర్‌కి అవకాశం ఉండేలా సన్నాహాలు జరుగుతున్నాయి. అంచనాలకు తగినంతగా రాణించలేకపోయిన శార్దుల్‌ ఠాకూర్‌ స్థానంలో తెలుగు క్రికెటర్‌ నితీశ్‌ కుమార్‌ రెడ్డి వచ్చే అవకాశం దాదాపు ఖరారే.
బ్యాటింగ్‌ వైపు సాయి సుదర్శన్‌, కరణ్‌ నాయర్‌లకు మరోసారి చాన్స్‌ దక్కేలా పరిస్థితి కనిపిస్తున్నది. టాప్‌ ఆర్డర్‌లో జైస్వాల్‌, రాహుల్‌, గిల్‌ కీలకంగా మారనున్నారు. బౌలింగ్‌లో సిరాజ్‌, ప్రసిద్ధ్‌లు ఎక్కడా వెనుకడుగు వేయకుండా నిలదొక్కుకోవాలి.
ఇంగ్లండ్‌ సైతం మొదటి టెస్టులో అద్భుతం చేసింది. ఇక జోఫ్రా ఆర్చర్‌ తిరిగి జట్టులోకి వస్తాడని ఊహించుకున్నా.. వ్యక్తిగత కారణాలతో ఆయన ఈ మ్యాచ్ నుంచి తప్పుకున్నాడు. దాంతో ఆతిథ్య జట్టు మొదటి మ్యాచ్ జట్టుతోనే బరిలోకి దిగబోతున్నది. క్రిస్‌ వోక్స్‌, కార్స్‌, జోష్‌ టంగ్‌ బౌలింగ్‌కి ధీటు. స్టోక్స్‌ కెప్టెన్సీతో పాటు బౌలింగ్‌ బాధ్యతలు పంచుకుంటాడు. టాప్‌ ఆర్డర్‌లో రూట్‌, డకెట్‌, పోప్‌, బ్రూక్‌ ఫామ్‌లో ఉన్నందుకు ఇంగ్లండ్‌ ఖుషీగా ఉంది. షోయబ్‌ బషీర్‌ స్పిన్నర్‌గా కొనసాగనున్నాడు.
టెండూల్కర్‌-అండర్సన్‌ ట్రోఫీని కాపాడుకోవడానికి ఇంగ్లండ్‌ దూకుడుగా సిద్ధమవుతుంటే.. భారత్ తప్పక గెలిచి సిరీస్‌లో నిలదొక్కుకోవాలని చూస్తున్నది. ఎడ్జ్‌బాస్టన్‌ ఈసారి ఎవరి పక్కన నిలుస్తుందో చూడాలి.