2024 సంవత్సరంలో భారత క్రికెట్ జట్టు బౌలింగ్ విభాగంలో అద్భుతమైన ప్రదర్శనను కనబరిచింది. ముఖ్యంగా ఐసీసీ టీ20 వరల్డ్ కప్ విజయంతో పాటు పలు ద్వైపాక్షిక సిరీస్‌ల విజయాల్లో బౌలర్ల పాత్ర కీలకమైంది. మూడు ఫార్మాట్లలో కలిపి భారత బౌలర్లు తమ శక్తిని చాటారు. 2024లో అత్యధిక వికెట్లు సాధించిన జస్ప్రీత్ బుమ్రా టీమిండియా విజయాలకు ప్రధాన కారణంగా నిలిచాడు.
34 ఇన్నింగ్స్‌ల్లో 86 వికెట్లు సాధించిన బుమ్రా, ప్రపంచ నంబర్ వన్ బౌలర్‌గా తన స్థాయిని మరోసారి నిరూపించుకున్నాడు. అతని యార్కర్లు, వేగం, కుదిపే లెంగ్త్ బంతులు ప్రత్యర్థి బ్యాటర్లకు చుక్కలు చూపించాయి. అతనికి తోడుగా రవీంద్ర జడేజా కూడా తన సత్తా చాటాడు. 28 ఇన్నింగ్స్‌ల్లో 49 వికెట్లు తీసిన జడేజా, ముఖ్యంగా టెస్టు క్రికెట్‌లో తన బలాన్ని ప్రదర్శించాడు. పరిమిత ఓవర్ల క్రికెట్‌లో ఆయన పెద్దగా ప్రభావం చూపించకపోయినా, టెస్టుల్లో జట్టు విజయాలకు త్రిమూర్తిగా నిలిచాడు.
ఇటీవల రిటైర్‌మెంట్ ప్రకటించిన రవిచంద్రన్ అశ్విన్, 2024లో టెస్టు క్రికెట్‌లోనే 21 ఇన్నింగ్స్‌ల్లో 47 వికెట్లు సాధించి మరోసారి తన ప్రత్యేకతను చాటాడు. అశ్విన్ సేవలకు ముగింపు పలికినప్పటికీ, ఆ స్థానాన్ని భర్తీ చేసే అవకాశాలను యువ ఆటగాడు వాషింగ్టన్ సుందర్ సొంతం చేసుకుంటున్నాడు. సుందర్ 23 ఇన్నింగ్స్‌ల్లో 40 వికెట్లు సాధించి, పరిమిత ఓవర్ల క్రికెట్‌తో పాటు టెస్టుల్లోనూ తన ప్రతిభను నిరూపించుకున్నాడు. గౌతమ్ గంభీర్ కోచ్‌గా వచ్చిన తర్వాత అతనికి మరిన్ని అవకాశాలు లభించడంతో తన ఆటను మెరుగుపర్చాడు.
హైదరాబాదీ పేసర్ మహ్మద్ సిరాజ్ కూడా 2024లో 34 ఇన్నింగ్స్‌ల్లో 40 వికెట్లు తీసి భారత బౌలింగ్ విభాగంలో కీలక ఆటగాడిగా నిలిచాడు. టీమిండియా అన్ని ఫార్మాట్లలో ఈ పేసర్ తన ప్రదర్శనతో ప్రేక్షకులను ఆకట్టుకున్నాడు. మొత్తంగా, 2024 టీమిండియా బౌలింగ్ విభాగం విజయాలను ముందుకు తీసుకెళ్లిన స్ఫూర్తిదాయకమైన సంవత్సరం. 2025లో కూడా ఈ ఊపును కొనసాగిస్తూ భారత బౌలర్లు మరిన్ని అద్భుతాలు చేయాలని అభిమానులు ఆశిస్తున్నారు.