ఇండ‌స్ట్రీలో చాలా మంది ఆర్టిస్టులు సినిమా కోసం ప్రాణం పెట్టి ప‌ని చేస్తుంటారు. మంచి పాత్ర దొరికితే దాని కోసం ఎంత రిస్క్ అయిన చేసేందుకు ఏ మాత్రం వెనుకాడ‌రు. అలాంటి వారిలో క‌మ‌ల్ హాస‌న్, విక్ర‌మ్, అజిత్, రామ్ ఇలా త‌దిత‌ర హీరోలు ఉన్నారు. ఇప్పుడు బాలీవుడ్ బిగ్ బీ త‌న‌యుడు అభిషేక్ బ‌చ్చ‌న్ త‌న టాలెంట్ ఏంటో నిరూపించుకునేందుకు సరికొత్త అవ‌తారం ఎత్తాడు. ఇప్పుడు అత‌ని ఫొటోలు సోష‌ల్ మీడియాలో హ‌ల్‌చ‌ల్ చేస్తుండ‌గా, అభిషేక్‌ని చూసిన ప్ర‌తి ఒక్క‌రు అవాక్క‌వుతున్నారు.
ఒక‌ప్పుడు అభిషేక్ అద్భుత‌మైన చిత్రాల‌తో ప్రేక్ష‌కుల‌ని అల‌రించాడు. కాని ఇప్పుడు చెప్పుకోద‌గ్గ చిత్రాలు చేయ‌డం లేదు. దీంతో నెటిజ‌న్స్ కూడా అభిషేక్‌ని సోష‌ల్ మీడియా వేదిక‌గా తెగ ట్రోల్ చేస్తుంటారు. దానికి అభిషేక్ పాజిటివ్‌గా, తెలివిగా స్పందిస్తుంటాడు. అయితే ప్ర‌స్తుతం త‌ను న‌టిస్తున్న తాజా చిత్రం బాబ్ బిస్వాస్ తో తానేంటో నిరూపించుకోవాల‌ని అభిషేక్ భావిస్తున్నాడు. ఇందుకోసం సరికొత్త లుక్‌లోకి మారాడు. ఫుల్‌ స్లీవ్‌ చొక్కా, పెద్ద కళ్లజోడు, మిడ్‌ పార్టీషియన్‌ జుట్టుతో అభిషేక్‌ని చూసి ఎవ‌రు గుర్తు ప‌ట్ట‌లేక‌పోతున్నారు.
అభిషేక్ బ‌చ్చ‌న్ ప్ర‌స్తుతం కహానీ చిత్రంలోని కాంట్రాక్ట్‌ కిల్లర్‌ బాబ్ బిస్వాస్ పాత్రలో నటిస్తున్నారు. . సుజోయ్ ఘోష్ దర్శకత్వంలో వచ్చిన కహానీ చిత్రంలోని కోల్డ్‌ బ్లడెడ్‌ కిల్లర్‌గా బిస్వాస్ పాత్రకు విమర్శకుల ప్రశంసలు దక్కాయి. ప్రముఖ బెంగాలీ నటుడు సస్వతా ఛటర్జీ ఈ పాత్ర పోషించారు. ఇప్పుడు అదే పాత్ర‌ను అభిషేక్ పోషిస్తున్నారు. కోల్‌క‌తాలో ప్రారంభమైన ఈ చిత్ర షూటింగ్ శ‌ర‌వేగంగా జ‌రుగుతుంది. సుజోయ్ ఘోష్ కుమార్తె డియా అన్నపూర్ణ ఘోష్ ఈ చిత్రంతో దర్శకురాలిగా పరిచయం అవుతున్నారు. అభిషేక్ సరసన చిత్రాంగఢ సింగ్ నటిస్తున్నారు. జ‌న‌వ‌రిలో చిత్ర షూటింగ్ మొద‌లు పెట్ట‌గా క‌రోనా వ‌ల‌న కొద్ది రోజులు వాయిదా ప‌డింది.