మన దేశంలో చాలామంది బ్యాంక్ ఉద్యోగం కోసం కలలు కంటున్నారు. ముంబైలోని సెంట్రల్ బ్యాంక్ ఆఫ్ ఇండియా, హ్యూమన్ క్యాపిటల్ మేనేజ్‌మెంట్ డిపార్ట్‌మెంట్ నిరుద్యోగులకు తీపికబురు అందించింది. సఫాయి కర్మచారి కమ్ సబ్-స్టాఫ్/ సబ్-స్టాఫ్ ఉద్యోగ ఖాళీల కోసం ఈ జాబ్ నోటిఫికేషన్ విడుదల కావడం గమనార్హం. పదో తరగతి పాసైన వాళ్లు ఈ ఉద్యోగ ఖాళీల కోసం దరఖాస్తు చేసుకునే ఛాన్స్ అయితే ఉంటుంది.
మొత్తం 484 ఉద్యోగ ఖాళీలు ఉండగా గుర్తింపు పొందిన బోర్డు లేదా ఇన్‌స్టిట్యూట్ నుండి 10వ తరగతి లేదా దానికి సమానమైన పరీక్షలో పాసైన వాళ్లు ఈ ఉద్యోగ ఖాళీలకు అర్హత కలిగి ఉంటారు. స్థానిక భాషపై కూడా పరిజ్ఞానం ఉన్నవాళ్లు ఈ ఉద్యోగ ఖాళీల కోసం దరఖాస్తు చేసుకోవచ్చు. 18 నుంచి 26 సంవత్సరాల మధ్య వయస్సు ఉన్నవాళ్లు ఈ ఉద్యోగ ఖాళీలకు అర్హత కలిగి ఉంటారని సమాచారం అందుతోంది.
ఎస్సీ, ఎస్టీ, ఓబీసీ, దివ్యాంగ అభ్యర్థులకు వయో పరిమితిలో సడలింపులు ఉండనున్నాయి. ఈ ఉద్యోగాలకు ఎంపికైన వాళ్లకు గరిష్టంగా 28145 రూపాయల వరకు వేతనం లభించనుంది. ఆన్ లైన్ పరీక్ష, లోకల్ లాంగ్వేజ్ టెస్ట్ ద్వారా అభ్యర్థుల ఎంపిక ప్రక్రియ జరుగుతుంది. ఎస్సీ, ఎస్టీ, దివ్యాంగులు, ఈఎస్‌ఎం అభ్యర్థులకు దరఖాస్తు ఫీజు 175 రూపాయలుగా ఉంది.
ఈ ఉద్యోగ ఖాళీలకు ఎంపికైన ఇతర అభ్యర్థులకు దరఖాస్తు ఫీజు 850 రూపాయలుగా ఉండనుందని సమాచారం అందుతోంది. ఆన్‌లైన్ రిజిస్ట్రేషన్‌కు జనవరి నెల 16వ తేదీ చివరి తేదీగా ఉంది. 2024 సంవత్సరం ఫిబ్రవరి నెలలో ఈ ఉద్యోగ ఖాళీలకు సంబంధించిన పరీక్షను నిర్వహించడం జరుగుతుంది.