గత పది రోజులుగా ఎక్కుడ చూసినా ‘అవెంజర్స్‌: ఎండ్గేమ్’కబుర్లే. ఆ క్రేజ్‌ నుంచి ఇంకా ఫ్యాన్స్ బయటపడలేదు. ఈలోగా ‘స్పైడర్‌మ్యాన్‌: ఫార్‌ ఫ్రమ్‌ హోమ్‌’ సినిమా కొత్త ట్రైలర్ వచ్చింది. దాంతో మార్వెల్ కామిక్స్ ఫ్యాన్స్ అంతా సర్‌ప్రైజ్‌ అయ్యిపోయారు. అయితే ఇక్కడో ట్విస్ట్ ఉంది.
‘ఎండ్గేమ్’ సినిమా ముగిసిన దగ్గర్నుంచి ‘స్పైడర్‌మ్యాన్‌: ఫార్‌ ఫ్రమ్‌ హోమ్‌’ సినిమా కథ మొదలవుతుందట. ‘‘అవెంజర్స్‌: ఎండ్గేమ్ సినిమాను మీరు చూడనట్లైతే.. దయచేసి ఇప్పుడు చూడకండి. ఎందుకంటే ఈ సినిమా (స్పైడర్‌మ్యాన్‌)లోని ముఖ్యమైన అంశాలు లీకైపోతాయి. ఒకవేళ చూసుంటే.. ఈ సినిమా ట్రైలర్‌ను చూడండి’ అని హాలీవుడ్‌ నటుడు టామ్‌ హోలాండ్‌ (స్పైడర్‌మ్యాన్‌) ముందుగానే హెచ్చరిస్తున్న సీన్ తో ట్రైలర్ మొదలైంది.
ఈ ట్రైలర్ లో విషయం ఏంటంటే…‘అవెంజర్స్‌: ఎండ్గేమ్’లో జరిగిన సంఘటనల అనంతరం పీటర్‌ పార్కర్‌ అలియాస్‌ స్పైడర్‌మ్యాన్‌ తన స్నేహితులతో కలిసి విహారయాత్ర నిమిత్తం యూరప్‌ వెళ్లాలనుకుంటాడు. ఇంతలో నిక్‌ ఫ్యూరీ (శామ్యుల్‌ జాక్సన్‌) టీమ్ ఓ ముఖ్యమైన పని నిమిత్తం స్పైడర్‌మ్యాన్‌ను టార్గెట్‌ చేసి శత్రువైన క్వెంటిన్‌ బెక్‌తో చేతులు కలపాలని డిమాండ్‌ చేస్తాడు. ఆ తర్వాత స్పైడర్‌మ్యాన్‌ ఏం చేశాడన్నది సినిమా చూసి తెలుసుకోవాలి. జాన్‌ వాట్స్‌ ఈ చిత్రానికి దర్శకత్వం వహించారు. జులై 2న సినిమా ప్రపంచవ్యాప్తంగా ప్రేక్షకుల ముందుకు రాబోతోంది.