అద్భుతమైన సువాసనతో పాటు ఎన్నో ఔషధ గుణాలు సమృద్ధిగా కలిగిన పుదీనా ఆకును రోజువారి ఆహారంలో తీసుకోవడంతో పాటు పుదీనా జ్యూస్ ను తయారు చేసుకొని సేవిస్తే ఎన్నో ఆరోగ్య ప్రయోజనాలను పొందవచ్చునని న్యూట్రిషన్ నిపుణులు సూచిస్తున్నారు. ముఖ్యంగా పుదీనా ఆకుల్లో సమృద్ధిగా విటమిన్ ఏ, విటమిన్ సి, , విటమిన్ బి 6,బి12, యాంటీ ఆక్సిడెంట్, ఫైబర్, ఐరన్, ఫోలిక్, పొటాషియం, కాల్షియం, మెగ్నీషియం వంటి సహజ పోషక పదార్థాలు సమృద్ధిగా లభిస్తాయి. ప్రతిరోజు పుదీనా జ్యూస్ ను సేవిస్తే కలిగే ఆరోగ్య ప్రయోజనాల గురించి తెలుసుకుందాం.
పుదీనా ఆకుల కషాయాన్ని ప్రతిరోజు సేవిస్తే ఇందులో ఉండే విటమిన్ సి, సహజ యాంటీ ఆక్సిడెంట్, యాంటీ బ్యాక్టీరియల్, యాంటీ ఫంగల్, యాంటీ వైరల్ గుణాలు సీజనల్గా వచ్చే అనేక ఇన్ఫెక్షన్ అలర్జీల నుంచి రక్షణ కల్పించే వ్యాధి నిరోధక శక్తిని మనలో పెంపొందిస్తాయి. అలాగే పుదీనాలో ఉండే యాంటీ ఇన్ఫ్లమేటరీ గుణాలు శరీరంలో ఏర్పడే ఫ్రీ రాడికల్స్ తొలగించి అనేక క్యాన్సర్ల ముప్పును తగ్గిస్తుంది, చర్మ సమస్యలను సరిచేసి వృద్ధాప్య ఛాయాలను ఆలస్యం చేస్తుంది.అతి బరువు సమస్యతో బాధపడేవారు తరచూ పుదీనా ఆకుల కషాయాన్ని సేవిస్తే ఇందులో ఉండే ఔషధ గుణాలు శరీరంలో చెడు కొలెస్ట్రాల్ సమర్థవంతంగా కరిగించి సహజ పద్ధతిలో శరీర బరువును నియంత్రించుకోవచ్చు.
ప్రతిరోజు ఉదయాన్నే పుదీనా ఆకుల రసంలో నిమ్మరసం తేనె కలుపుకొని సేవిస్తే శ్వాస సంబంధిత సమస్యలు తొలగిపోవడమే కాకుండా గొంతు నొప్పి కడుపులో మంట, ఉబ్బసం,మలబద్ధకం వంటి సమస్యల నుంచి తక్షణ ఉపశమనం పొందవచ్చు. పుదీనా దంత సమస్యలను, చిగుళ్ల సమస్యలను తగ్గిస్తుంది. పుదీనా నోటి దుర్వాసనకు కారణమయ్యే బ్యాక్టీరియాను నశింపజేసి రోజంతా తాజాదనాన్ని పెంపొందిస్తుంది.పుదీనాను మజ్జిగతో కలిపి తీసుకుంటే మన శరీరంలో వేడినీ తగ్గించి డిహైడ్రేషన్ సమస్య నుంచి కాపాడుతుంది. రక్తంలో గ్లూకోస్ స్థాయిలను నియంత్రించి షుగర్ వ్యాధిని నియంత్రణలో ఉంచుతుంది.