తిరుమలలో భక్తుల రద్దీ పెరుగుతున్న వేళ, అలిపిరి ప్రాంతంలో మరోసారి చిరుతపులి హల్చల్ చేసింది. శుక్రవారం రాత్రి ఎస్వీ జూ పార్క్ రోడ్డులో బైక్పై వెళ్తున్న ఇద్దరు వ్యక్తులపై చిరుత ఆకస్మికంగా దాడి చేయడానికి ప్రయత్నించింది. అయితే బైక్ వేగంగా ఉండటంతో చిరుత పంజాకు వారు చిక్కకుండా తృటిలో తప్పించుకున్నారు. ఈ ఘటనకు సంబంధించిన వీడియో సామాజిక మాధ్యమాల్లో వైరల్ అవుతోంది.
పొదల మధ్య పొంచి ఉన్న చిరుత ఒక్కసారిగా బైక్ దిశగా దూకింది. అయితే బైక్ వేగంగా వెళ్తుండటంతో చిరుత లక్ష్యాన్ని అందుకోలేకపోయింది. దాంతో అది స్వల్పంగా బైక్ను ఢీకొని నేలపై పడిపోయింది. వెంటనే వెనుక వస్తున్న కారులో ఉన్న వ్యక్తులు ఈ దృశ్యాన్ని సెల్ఫోన్లో రికార్డ్ చేశారు. వీడియో ఇప్పుడు భక్తుల్లో భయాందోళన కలిగిస్తోంది.
ఇటీవల కాలంలో తిరుమల ప్రాంతంలో చిరుతల సంచారం తీవ్రమవుతోంది. ఆలయానికి వచ్చే మార్గాల్లో భక్తులు తిరుగుతున్న చోట్లే చిరుతలు కనిపించడమే కాకుండా, గతంలో కొన్ని దాడులు జరగడం భక్తుల్లో ఆందోళన రేకెత్తిస్తోంది. కొన్ని సంఘటనల్లో భక్తులు గాయపడగా, ఒక చిన్నారి ప్రాణాలు కోల్పోయిన విషాద ఘటన కూడా జరిగింది.
ఈ నేపథ్యంలో శుక్రవారం రాత్రి జరిగిన తాజా ఘటనపై టీటీడీ, అటవీశాఖ అధికారులు అప్రమత్తమయ్యారు. భక్తుల భద్రత దృష్ట్యా రాత్రి సమయంలో తిరుమల ఘాట్ రోడ్డులో ద్విచక్ర వాహనాల రాకపోకలపై తాత్కాలికంగా నిషేధం విధించారు. చిరుతల సంచారాన్ని అరికట్టేందుకు కెమెరాలు, ఖచ్చితమైన మానిటరింగ్, ప్రత్యేక బృందాలతో గస్తీ బలపరిచారు.
ఇక తిరుమలలో భక్తుల రద్దీ కొనసాగుతోంది. శుక్రవారం రోజున మొత్తం 73,576 మంది భక్తులు స్వామివారి దర్శనం పొందగా, 25,227 మంది తలనీలాలు సమర్పించారు. ఆలయ హుండీలో 4.23 కోట్ల రూపాయల ఆదాయం సమకూరిందని టీటీడీ అధికారులు తెలిపారు. ఒకవైపు భక్తులు పెరుగుతున్న రద్దీతో స్వామివారి దర్శనంలో తలమునకలైతే, మరోవైపు చిరుతల ఆక్రమణ భయాందోళన కలిగిస్తోంది. భక్తుల భద్రతకు సంబంధించి మరింత కట్టుదిట్టమైన చర్యలు తీసుకోవాలని పలువురు అభిప్రాయపడుతున్నారు.