హిందూ ధర్మంలో, జ్యోతిషశాస్త్రంలో శని దేవుడి పేరు వినగానే చాలామందికి భయం కలుగుతుంది. కానీ ఆ భయం వెనుక ఉన్న అసలు నిజం చాలామందికి తెలియదని జ్యోతిష నిపుణులు చెబుతున్నారు. తొమ్మిది గ్రహాలలో అత్యంత నెమ్మదిగా కదిలే గ్రహం శని. అందుకే ఆయన ప్రభావం వ్యక్తి జీవితంపై ఎక్కువకాలం కొనసాగుతుందని జ్యోతిషశాస్త్రం చెబుతుంది. అయితే శని శిక్షించేవాడు కాదు, కర్మలకు తగిన ఫలితాన్ని ఇచ్చేవాడే అని ప్రముఖ జ్యోతిష్కుడు హితేంద్ర కుమార్ స్పష్టం చేస్తున్నారు.
శని ప్రభావం ప్రారంభమైనప్పుడు జీవితం ఒక్కసారిగా తారుమారు అవుతున్నట్టు అనిపించవచ్చు. కష్టపడి పనిచేసినా ఫలితం లేకపోవడం, చివరి నిమిషంలో పనులు ఆగిపోవడం, ఎటువంటి కారణం లేకుండా మానసిక ఒత్తిడి పెరగడం వంటి అనుభవాలు ఎదురైతే అవి శని దుష్ట ప్రభావానికి సంకేతాలై ఉండొచ్చని ఆయన హెచ్చరిస్తున్నారు. జ్యోతిష్య ప్రకారం జాతకంలో శని బలహీనంగా ఉన్నప్పుడు, దుష్ట గ్రహాల ప్రభావం ఉన్నప్పుడు లేదా ఏల్నాటి శని కాలంలో ఉన్నప్పుడు ఈ సమస్యలు తీవ్రంగా కనిపిస్తాయి.
ఆర్థికంగా అనవసర ఖర్చులు పెరగడం, వ్యాపారంలో అకస్మాత్తుగా నష్టాలు రావడం, అప్పుల ఊబిలో చిక్కుకోవడం వంటి పరిస్థితులు శని ప్రభావంలో సాధారణం. శారీరకంగా చూస్తే కాళ్ల నొప్పులు, కీళ్ల సమస్యలు, ఎముకలకు సంబంధించిన వ్యాధులు హఠాత్తుగా రావడం కూడా శని ప్రతికూల ఫలితంగా జ్యోతిషులు చెబుతున్నారు. ఇవే కాకుండా కుటుంబంలో కలహాలు, సమాజంలో గౌరవం తగ్గిపోవడం, చట్టపరమైన సమస్యలు ఎదురవడం వంటి పరిస్థితులు కూడా శని కోపానికి సంకేతాలుగా భావిస్తారు.
మానసికంగా కూడా శని ప్రభావం తీవ్రంగా ఉంటుంది. అలసట, సోమరితనం, నిస్సహాయ భావన, తప్పు దారుల వైపు మనసు మళ్లడం వంటి మార్పులు కనిపిస్తే వాటిని నిర్లక్ష్యం చేయకూడదని నిపుణులు సూచిస్తున్నారు. ఇవన్నీ కలిపి జీవితం మీద భారంగా మారినప్పుడు శని శాంతి మార్గాలను అనుసరించడం ఉపశమనం ఇస్తుందని జ్యోతిష్యం చెబుతోంది.
శని దుష్ట దృష్టిని తగ్గించడానికి కొన్ని సులభమైన కానీ ప్రభావవంతమైన మార్గాలు ఉన్నాయని హితేంద్ర కుమార్ తెలిపారు. ప్రతి శనివారం సాయంత్రం రావి చెట్టు కింద ఆవ నూనెతో దీపం వెలిగించి, అందులో కొద్దిగా నల్ల నువ్వులు వేయడం శని అనుగ్రహాన్ని పొందేందుకు మంచి మార్గంగా భావిస్తారు. అలాగే శనివారం భక్తితో హనుమాన్ చాలీసా లేదా సుందరకాండ పారాయణం చేయడం వల్ల శని దోష తీవ్రత తగ్గుతుందని విశ్వాసం.
ఇంకా ఒక ముఖ్యమైన మార్గం ‘నీడ దానం’. శనివారం ఒక గిన్నెలో ఆవ నూనె తీసుకుని అందులో తన ప్రతిబింబం చూసి, ఆ నూనెను శని ఆలయంలో సమర్పించడం లేదా అవసరమైన వారికి దానం చేయడం వల్ల శని ప్రభావం శాంతిస్తుందని జ్యోతిష శాస్త్రం చెబుతోంది. భయం కంటే కర్మలకు ప్రాధాన్యం ఇస్తే, శని కూడా అనుకూల ఫలితాలు ఇస్తాడని నిపుణులు స్పష్టం చేస్తున్నారు.