జ్యోతిష్య శాస్త్రంలో కొన్ని గ్రహాలకు ప్రత్యేకమైన శక్తి ఉందని పండితులు చెబుతుంటారు. ముఖ్యంగా వ్యక్తి జీవితంలో ధనం, గౌరవం, స్థిరత్వాన్ని నిర్ణయించే ప్రధాన గ్రహంగా గురు గ్రహాన్ని భావిస్తారు. గురువు అనుగ్రహం ఉన్న జాతకులకు జీవితంలో ఎన్నో శుభఫలితాలు సహజంగానే లభిస్తాయని జ్యోతిష్య నిపుణుల అభిప్రాయం. కష్టకాలంలోనూ అదృష్టం చేయి అందించడం, చేసిన ప్రయత్నాలకు తగిన ఫలితం దక్కడం వంటి అనుభవాలు వీరి జీవితంలో తరచుగా కనిపిస్తాయి.
గురు గ్రహం కేవలం సంపదకే కాదు, జ్ఞానం, ధర్మబుద్ధి, అదృష్టానికి కూడా కారకుడిగా పరిగణిస్తారు. అందుకే గురు బలంగా ఉన్నవారు ఉద్యోగం, వ్యాపారం, పెట్టుబడుల విషయంలో వేగంగా ఎదుగుతారని చెబుతారు. వారి ఇంట్లో ఆదాయ ప్రవాహం ఆగకుండా కొనసాగుతుందని, ఆర్థికంగా భద్రత కూడా ఏర్పడుతుందని జ్యోతిష్య పండితులు వివరిస్తున్నారు.
జాతకంలో గురు గ్రహం రెండవ స్థానం, ఐదవ స్థానం, తొమ్మిదవ స్థానం లేదా పదకొండవ స్థానంలో బలంగా ఉంటే ధనయోగాలు ఏర్పడతాయని శాస్త్రం చెబుతోంది. రెండవ స్థానం కుటుంబ సంపద, వాక్చాతుర్యం, పొదుపును సూచిస్తే, పదకొండవ స్థానం లాభాలకు సంకేతంగా ఉంటుంది. ఈ స్థానాల్లో గురుడు ఉన్నవారు సంపాదన పెంచడమే కాకుండా భవిష్యత్తును దృష్టిలో పెట్టుకుని ధనాన్ని జాగ్రత్తగా నిల్వ చేసుకుంటారని చెబుతున్నారు.
ఇక గురు గ్రహంతో పాటు శుక్ర గ్రహం కలిసి ప్రభావం చూపితే ఆ వ్యక్తి జీవితంలో ఐశ్వర్యానికి హద్దులుండవని పండితుల అభిప్రాయం. శుక్రుడు సుఖాలు, విలాసాలు, భౌతిక ఆనందాలకు సూచిక. గురు–శుక్రుల యోగం ఉన్న జాతకులకు డబ్బు విషయంలో లోటు ఉండదని, విలాసవంతమైన జీవితం, బంగారం, విలువైన వస్తువులు సంపాదించే యోగం కలుగుతుందని చెబుతున్నారు. అందుకే జాతకంలో ఈ రెండు గ్రహాల బలం ఉంటే జీవితంలో సంపదతో పాటు సంతోషం కూడా నిలకడగా ఉంటుందని జ్యోతిష్య శాస్త్రం స్పష్టం చేస్తోంది.