సాయంత్రం వేళ ఇంట్లో దీపం వెలిగించడం అనేది చాలా ఇళ్లలో రోజూ జరిగే సాధారణ అలవాటే. కానీ అదే అలవాటు వెనుక ఉన్న ఆధ్యాత్మిక భావం, వాస్తు ప్రాముఖ్యత గురించి చాలా మందికి పూర్తిగా అవగాహన ఉండదు. పెద్దలు, వాస్తు నిపుణులు చెబుతున్న మాట ప్రకారం.. సరైన పద్ధతిలో వెలిగించిన ఒక చిన్న దీపం కూడా ఇంటి వాతావరణాన్ని పూర్తిగా మార్చే శక్తిని కలిగి ఉంటుంది.
వాస్తు శాస్త్రం ప్రకారం సూర్యాస్తమయం తర్వాత ఇంట్లో దీపం వెలిగించడం అత్యంత శుభప్రదమని చెబుతారు. ఈ సమయం రోజంతా పేరుకుపోయిన అలసట, ప్రతికూల ఆలోచనలు తొలగిపోయే సంధికాలంగా భావిస్తారు. అదే సమయంలో వెలిగించిన దీపం ఇంట్లో సానుకూల శక్తిని ఆహ్వానిస్తుందని, మనసుకు ప్రశాంతతను అందిస్తుందని నమ్మకం. ప్రతిరోజూ ఒకే సమయానికి దీపారాధన చేయడం కుటుంబంలో స్థిరత్వం, మనోశాంతిని పెంచుతుందని వాస్తు పండితులు సూచిస్తున్నారు.
దీపం వెలిగించే స్థలం కూడా ఎంతో కీలకమని చెబుతున్నారు. ఇంట్లో ఆలయం ఉంటే అక్కడ, లేదంటే ఈశాన్య దిశలో దీపం వెలిగించడం అత్యంత మంచిదిగా భావిస్తారు. ఆలయం లేని ఇళ్లలో ప్రధాన ద్వారం దగ్గర దీపం వెలిగిస్తే ఇంట్లోకి ప్రతికూల శక్తి ప్రవేశించకుండా అడ్డుకుంటుందని సంప్రదాయ నమ్మకం. అందుకే పాత ఇళ్లలో ఇప్పటికీ సాయంత్రం వేళ ద్వారం దగ్గర దీపం వెలిగించే ఆచారం కనిపిస్తుంది.
దీపానికి ఉపయోగించే నూనె లేదా నెయ్యికీ ప్రత్యేక ప్రాధాన్యం ఉందని చెబుతారు. నెయ్యితో వెలిగించే దీపం ఇంటి వాతావరణాన్ని శుద్ధి చేస్తుందని, మనస్సుకు స్థిరత్వాన్ని ఇస్తుందని విశ్వాసం. నెయ్యి అందుబాటులో లేకపోతే ఆవ నూనెను ఉపయోగించవచ్చని నిపుణులు సూచిస్తున్నారు. ఏ నూనె వాడినా దీపం శుభ్రంగా ఉండటం, వత్తి సరిగా ఉండటం తప్పనిసరి.
దీపం వెలిగించే సమయంలో మనస్సు ప్రశాంతంగా ఉండాలని పెద్దలు హెచ్చరిస్తారు. తొందరపాటు, కోపం లేదా ఆందోళనతో దీపం వెలిగిస్తే ఆశించిన ఫలితం ఉండదని చెబుతారు. అలాగే దీపాన్ని ఊదివేసి ఆర్పడం కంటే సహజంగా ఆరేలా చేయడం మంచిదని వాస్తు సూచనలు చెబుతున్నాయి. చిన్న విషయాల్లా అనిపించినా ఇవే దీపారాధనలో అసలు రహస్యమని నిపుణుల మాట.
అయితే దీపాన్ని తప్పు సమయంలో, తప్పు దిశలో లేదా పరిశుభ్రత లేకుండా వెలిగిస్తే ఆశించిన శుభఫలితాల బదులు మానసిక ఒత్తిడి, ఆర్థిక ఇబ్బందులు, ఇంట్లో అసంతృప్తి పెరిగే అవకాశం ఉందని కూడా చెబుతున్నారు. అందుకే దీపారాధనను కేవలం సంప్రదాయంగా కాకుండా, శ్రద్ధతో పాటించే ఆధ్యాత్మిక అలవాటుగా మార్చుకోవాలని సూచిస్తున్నారు.