తెలంగాణలో ఫార్ములా ఈ-కార్ రేస్ కేసు రాజకీయాలు వేడెక్కిస్తున్నాయి. ఈ కేసు విచారణలో ఈడీ (ఎన్‌ఫోర్స్‌మెంట్ డైరెక్టరేట్), ఏసీబీ (ఆంటీ-కరప్షన్ బ్యూరో) దూకుడు పెంచాయి. ఈ కేసులో తాజాగా హెచ్ఎండీఏ మాజీ చీఫ్ ఇంజినీర్ బీఎల్ఎన్ రెడ్డి, సీనియర్ ఐఏఎస్ అధికారి అరవింద్ కుమార్ హాజరయ్యారు. బీఎల్ఎన్ రెడ్డి ఈడీ ఎదుట హాజరై అన్ని ఆధారాలను సమర్పించినట్లు సమాచారం.
ఈడీ అధికారులు బీఎల్ఎన్ రెడ్డి వాంగ్మూలాన్ని నమోదు చేయడం ప్రారంభించారు. ఫార్ములా ఈ రేస్ నిర్వహణలో నిధుల మళ్లింపులపై విచారణ కొనసాగుతోంది. రేస్ నిర్వహణకు సంబంధించిన అనుమతుల దశలో నిబంధనల ఉల్లంఘన, నిధుల లావాదేవీలు ప్రధానంగా ఈ కేసులో చర్చనీయాంశంగా మారాయి. బీఎల్ఎన్ రెడ్డి కీలక సమాచారం అందించినట్లు తెలుస్తోంది.
అటు, ఈ కేసులో మరో కీలక వ్యక్తి, ఏ2గా ఉన్న సీనియర్ ఐఏఎస్ అధికారి అరవింద్ కుమార్ కూడా ఏసీబీ ఎదుట హాజరయ్యారు. నగదు బదిలీకి సంబంధించి ఆయన్ను ఏసీబీ అధికారులు ప్రశ్నిస్తున్నారు. నగదు తరలింపుల్లో ఆయన పాత్ర కీలకమని ఆరోపణలు ఉన్నాయి. ఏసీబీ కార్యాలయం వద్ద పోలీసులు భద్రతను కట్టుదిట్టం చేశారు.
ఈ కేసు రాజకీయాలు మరింత వేడెక్కిస్తుందని అంచనా వేస్తున్నారు. అధికారుల మధ్య స్నేహ సంబంధాలు, ప్యాక్టులు విచారణలో బయటపడే అవకాశం ఉందని నిపుణులు భావిస్తున్నారు. ఫార్ములా ఈ కేసు తెలంగాణ రాజకీయాల్లో పలు ఆసక్తికర పరిణామాలకు దారితీస్తుందని స్పష్టమవుతోంది.
