విశాఖపట్నంలో ఉప ముఖ్యమంత్రి పవన్ కల్యాణ్ మరోసారి తన ప్రత్యేక శైలిని బాధితుల ఆవేదనపై స్పందించారు. ప్రజల సమస్యలు తనవేనన్నట్లుగా స్పందిస్తూ విభిన్న ప్రతిభావంతులు, ఆటో డ్రైవర్ల వినతులను ఓపికగా విని తక్షణ చర్యలకు హామీ ఇచ్చారు. అధికార పదవిలో ఉన్నప్పటికీ, జనసేన అధినేతగా గతంలో ఇచ్చిన మాటలను గుర్తుచేసే విధంగా ఆయన స్పందన కనిపించింది.
విజువల్లీ ఛాలెంజ్డ్ యూత్ అసోసియేషన్ సభ్యులు పవన్ను కలసి పలు సమస్యలను వివరించారు. ప్రభుత్వం అమలు చేస్తున్న జీవో నంబర్ 2లో మార్పులు చేసి, రోస్టర్ పాయింట్ 6ని జనరల్గా మార్చాలని వారు అభ్యర్థించారు. ఇలా చేస్తే అర్హులైన అంధ పురుష అభ్యర్థులకు కూడా ఉద్యోగావకాశాలు అందుతాయని వారు పేర్కొన్నారు. అంతేకాదు, వారికి ప్రత్యేకంగా రేషన్ కార్డులు మంజూరు చేస్తే ప్రభుత్వ సంక్షేమ పథకాలు అందరికీ సులభంగా చేరతాయని విజ్ఞప్తి చేశారు. అలాగే సామాజిక పింఛన్ల పంపిణీలో వస్తున్న ఇబ్బందులను కూడా పవన్ దృష్టికి తీసుకువచ్చారు. ఈ సమస్యలను పవన్ శ్రద్ధగా విని, కేబినెట్లో చర్చించి పరిష్కారానికి కృషి చేస్తానని హామీ ఇచ్చారు.
ఇక ఆటో డ్రైవర్లు కూడా ఉప ముఖ్యమంత్రిని కలిసి తమ కష్టాలను వివరించారు. ముఖ్యంగా స్త్రీ శక్తి పథకం కారణంగా తమ ఆదాయాలు తగ్గిపోతున్నాయని వారు వాపోయారు. దీనిపై పవన్ స్పందిస్తూ, ఈ పథకం కూటమి ప్రభుత్వ సూపర్ సిక్స్ హామీల్లో భాగమని, మహిళలకు ఆర్థిక స్వావలంబన కల్పించడమే దీని ప్రధాన ఉద్దేశమని చెప్పారు. అయితే ఆటో డ్రైవర్ల ఆదాయం తగ్గిపోకుండా ఉండే మార్గాలను ప్రభుత్వం పరిశీలిస్తుందని భరోసా ఇచ్చారు.
ఇటీవల పవన్ కల్యాణ్ పలు వర్గాల ప్రజలను కలుసుకుంటూ వారి సమస్యలు ప్రత్యక్షంగా వింటున్నారు. ఈ క్రమంలో విభిన్న ప్రతిభావంతులు, ఆటో డ్రైవర్ల సమస్యలపై సానుకూల హామీ ఇవ్వడం ప్రజల్లో విశ్వాసాన్ని పెంచుతోంది. ప్రజల సమస్యలను కేబినెట్ స్థాయిలో చర్చించి పరిష్కారం కోసం కృషి చేయడం ఉప ముఖ్యమంత్రిగా పవన్ శైలికి కొత్త గుర్తింపుగా నిలుస్తుందని విశాఖలో రాజకీయ వర్గాలు అభిప్రాయపడుతున్నాయి.