ప్రపంచంలో అతిపెద్ద మంచుకొండగా గుర్తింపు పొందిన A23a ఇప్పుడు శీఘ్రంగా చిన్న చిన్న ముక్కలుగా విడిపోయి సముద్రంలో తేలుతున్నది. అంటార్కిటికాలో జన్మించిన ఈ ఐస్‌బర్గ్ ప్రస్తుతం సౌత్ జార్జియా దీవుల సమీపంలో ఉంది. నాసా విడుదల చేసిన ఉపగ్రహ చిత్రాల ప్రకారం, ఉత్తర అంచు నుంచి విరిగిపోతున్న ఈ మంచు ముక్కలు సముద్రంలో నక్షత్రాల్లా చిమ్ముచిమ్ముగా కనిపిస్తున్నాయి. శాస్త్రవేత్తలు దీన్ని ‘ఎడ్జ్ వేస్టింగ్’ ప్రక్రియగా పేర్కొంటున్నారు.
ఈ పరిణామం సముద్ర జీవుల జీవన విధానాన్ని ప్రభావితం చేయనుంది. సౌత్ జార్జియా దీవులు రెండు మిలియన్లకు పైగా పెంగ్విన్లకు నిలయం. కానీ A23a తీరానికి దగ్గరగా ఉండటం వల్ల అవి ఆహారం కోసం ఎక్కువ దూరం ప్రయాణించాల్సి రావచ్చు. మంచు కరిగే నీరు సముద్ర ఉష్ణోగ్రత, లవణీయతను మార్చే అవకాశం ఉండటంతో స్థానిక పర్యావరణంపై ప్రభావం తథ్యమేనంటున్నారు శాస్త్రవేత్తలు.
మరోవైపు, ఈ మంచు ముక్కలు నౌకాయానానికి కూడా ముప్పుగా మారే అవకాశం ఉంది. ఇప్పటివరకు విడిపోయిన అతిపెద్ద ముక్క A23c సుమారు 50 చదరపు మైళ్ల విస్తీర్ణంలో ఉంది. కొన్ని చిన్న ముక్కలు అర మైలు వెడల్పు వరకు ఉండటంతో, చీకటి సమయాల్లో ఇవి నౌకలకు కనిపించకుండా ప్రమాదకరంగా మారతాయి. అయితే, మంచు కరిగే ప్రక్రియతో సముద్రంలో పోషకాలు విడుదలై పాచి వృద్ధికి సహకరిస్తాయని విశ్లేషకులు అంటున్నారు.
శాస్త్రవేత్తలు చెప్పిన దాని ప్రకారం, వాతావరణ మార్పుల ప్రభావంతో ఇలాంటి భారీ మంచుకొండల విడిపోవడం భవిష్యత్తులో మరింత ఎక్కువగా జరగవచ్చని హెచ్చరిస్తున్నారు. ఇది సముద్ర మట్టాల పెరుగుదలతో పాటు వాతావరణ సమతుల్యతపై తీవ్ర ప్రభావం చూపే అవకాశం ఉంది. A23a పరిణామం భూమికి హెచ్చరికగా మారిందని నిపుణులు అంటున్నారు.