హిందూ సంప్రదాయంలో వంటగది అంటే కేవలం ఆహారం తయారయ్యే స్థలం మాత్రమే కాదు.. అది అన్నపూర్ణ దేవి, లక్ష్మీ దేవి సంచారం చేసే పవిత్ర ఆలయమని పెద్దలు చెబుతుంటారు. అందుకే ఒక్కోసారి ఎంత సంపాదన ఉన్నా ఇంట్లో నిలవకపోవడానికి వంటగదిలో జరిగే కొన్ని తెలియని తప్పులే కారణమని ఆధ్యాత్మిక పండితులు హెచ్చరిస్తున్నారు. నిత్యం వంట చేసే సమయంలో చిన్న నియమాలు పాటిస్తే చాలు.. ఇంట్లో ఐశ్వర్యం తానేం తలుపు తడుతుందంటారు.
వంట మొదలుపెట్టే ముందు శరీరం, మనస్సు రెండూ శుభ్రంగా ఉండాలి అనేది మొదటి నిబంధన. నిద్ర లేచిన వెంటనే అటే అటే వంటలో పడిపోవడం కంటే, స్నానం చేసి శుభ్రమైన దుస్తులు ధరించి వంట చేయడం ఆహారానికి పవిత్రతను తీసుకొస్తుందని విశ్వాసం. అలా తయారైన ఆహారం ఇంట్లోని ప్రతి ఒక్కరి ఆరోగ్యంతో పాటు అదృష్టానికీ కారణమవుతుందని చెబుతారు. వంటగది శుభ్రత గురించి ఎంత చెప్పినా తక్కువే. గ్యాస్ దగ్గర చిందిన పదార్థాలు, మూలల్లో పేరుకుపోయిన మురికి, ఎంగిలి వాసన వచ్చే పాత్రలు.. ఇవన్నీ లక్ష్మీ దేవిని దూరం చేసే సంకేతాలట. ముఖ్యంగా విరిగిన పాత్రలు, మాసిపోయిన వస్తువులను వంటగదిలో ఉంచడం ఇంట్లో నెగటివ్ ఎనర్జీ పెరగడానికి ప్రధాన కారణమని పెద్దలు చెబుతున్నారు.
వంట పూర్తయ్యాక మొదటి ముద్ద దేవుడికి పెట్టే ఆనవాయితీ కేవలం ఆచారం కాదు.. అది ఇంట్లో ఐశ్వర్యాన్ని స్థిరంగా ఉంచే శక్తివంతమైన సాధనగా భావిస్తారు. అలాగే వంట ప్రారంభించే ముందు స్టవ్కు మనసులో ఒక క్షణం నమస్కారం చేయడం, అగ్నిని సాక్షిగా భావించడం కూడా శుభప్రదమట. మరో ముఖ్యమైన విషయం.. వంట చేసేటప్పుడు కూర్చొని కోపంగా మాట్లాడటం, గొడవలు పెట్టుకోవడం, నెగటివ్ మాటలు పలకడం ఇంట్లోని వాతావరణానికే కాదు.. ఆహార శక్తిపై కూడా తీవ్ర ప్రభావం చూపుతుందని నమ్మకం. శాంతంగా, ప్రశాంత మనస్సుతో వంట చేసిన ఆహారం ఇంట్లో ఆనందం వర్షంలా కురిపిస్తుందంటారు.
రాత్రి పూట వంటగదిని నిర్లక్ష్యం చేయడం కూడా చాలా మందిలో కనిపించే అలవాటు. ఎంగిలి పాత్రలను అలాగే వదిలేయడం, సింక్ నిండా నీళ్లు లేకుండా పోవడం లక్ష్మీ దేవికి అసలు ఇష్టం లేదట. పడుకునే ముందు వంటగది శుభ్రంగా ఉంచి, ఒక గిన్నెలో నీరు నింపి ఉంచితే ఇంట్లో సానుకూల శక్తి నిలుస్తుందని ఆధ్యాత్మిక నిపుణులు చెబుతున్నారు. ఇలా రోజూ తెలియక చేసే చిన్న చిన్న తప్పులే కొన్ని ఇళ్లలో డబ్బు నిలవకపోవడానికి అసలు కారణమని ఇప్పుడు పెద్దలు గుర్తు చేస్తున్నారు. వంటగదిలో శుభ్రత, శాంతి, భక్తి ఈ మూడూ కలిస్తే.. లక్ష్మీ దేవి కృప ఇంటి తలుపు దాటకుండా ఎప్పటికీ బయటకు పోదనే నమ్మకం మరింత బలపడుతోంది.