ఇంట్లో, ఆఫీసులో, రద్దీ రోడ్లపై ఒత్తిడితో జీవితం పరుగులు తీస్తున్న ఈ రోజుల్లో మనకు సరైన వ్యాయామానికి సమయం కేటాయించడం చాలా కష్టం. అయితే, రోజూ కాస్త సైకిల్ తొక్కితేనే ఆరోగ్యానికి ఎంతో మేలు చేకూరుస్తుందని ఆరోగ్య నిపుణులు అంటున్నారు. చిన్నప్పుడు ఆటలగా చూసిన సైక్లింగ్ ఇప్పుడు ప్రతి వయసువారికీ గొప్ప ఆరోగ్య రహస్యం అవుతోంది.
సైకిల్ మీద కొన్ని కిలో మీటర్లు దూరం ప్రయాణిస్తే శరీరానికి సమగ్ర వ్యాయామం లభిస్తుంది. ముఖ్యంగా వయసుతో పాటు పేరుకుపోయే కొవ్వును కరిగించి, శరీరాన్ని స్లిమ్గా మార్చడానికి సైక్లింగ్ ఎంతగానో ఉపయోగపడుతుంది. శరీరంలోని ఆక్సిజన్ సరఫరా బాగా జరుగుతుంది. ఏకాగ్రత పెరుగుతుంది. డయాబెటిస్, రక్తపోటు వంటి సమస్యలు దరిచేరవు. ఇప్పటికే ఉన్నవారికి సైతం ఇది అదుపులో ఉంచేందుకు తోడ్పడుతుంది.
అంతేకాదు, సైక్లింగ్ మానసిక ఆరోగ్యానికి కూడా వరమని నిపుణులు చెబుతున్నారు. రోజూ సైకిల్ తొక్కితే మనసు ఉల్లాసంగా మారుతుంది. ఫీల్ గుడ్ హార్మోన్స్గా పిలువబడే ఎండార్ఫిన్స్ ఎక్కువగా విడుదలై, ఒత్తిడి తగ్గుతుందని పరిశోధనలు చెబుతున్నాయి. ఆందోళన, డిప్రెషన్ లాంటి సమస్యల నుంచి బయట పడటానికి ఇది సహాయపడుతుంది. పనిలో, వ్యక్తిగత జీవితంలో మానసికంగా శాంతంగా ఉండటానికి సైక్లింగ్ తోడ్పడుతుంది.
ఇంకా, కండరాలు దృఢంగా తయారవుతాయి. కీళ్ల కదలికల్లో అనుసరణ (ఫ్లెక్సిబిలిటీ) పెరుగుతుంది. కీళ్ల సమస్యలు తగ్గుతాయి. రక్తప్రసరణ సజావుగా జరుగుతుంది. ముఖ్యంగా చెడు కొలెస్ట్రాల్ స్థాయిలు తగ్గడం ద్వారా గుండె సంబంధిత సమస్యలకు దూరం కావచ్చు. ఇక బరువు తగ్గాలనుకునేవారికి సైక్లింగ్ నిజంగా అద్భుతమైన తోడ్పాటు. గంట సైక్లింగ్ చేస్తే సుమారుగా 400–600 వరకు క్యాలరీలు ఖర్చవుతాయి. క్రమంగా బరువు తగ్గడానికి ఇది పెద్ద సహాయకారి. దాంతో పాటు ఇది కార్డియో వ్యాయామంలా పనిచేస్తుంది. గుండె పనితీరు మెరుగవుతుంది, బ్లడ్ ప్రెజర్ కూడా సాధారణ స్థాయిలో ఉంచుతుంది.
కేవలం శారీరక ఆరోగ్యం మాత్రమే కాదు… సైక్లింగ్ చేయటం వల్ల ప్రకృతిని దగ్గరగా చూసే అవకాశం కూడా లభిస్తుంది. చల్లని గాలి, ఆకులు, పూలు… ఇవన్నీ మనసుకు నూతన ఉల్లాసాన్ని అందిస్తాయి. రోజుకు కనీసం 30 నిమిషాలు అయినా సైకిల్ తొక్కితే జీవనశైలి రోగాలు దరిచేరవు అని డాక్టర్లు సూచిస్తున్నారు. అందువల్ల… బిజీ షెడ్యూల్ మధ్య కాసేపు సైకిల్ కి సమయం కేటాయించండి. ఆరోగ్యాన్ని ఎంచుకోండి. చిటికెలో ఫిట్నెస్కి సైక్లింగ్ ఓ సరళ మార్గం అవుతుందని మర్చిపోకండి.