తెలంగాణ ఫార్ములా ఈ-రేస్ వివాదం నేపథ్యంలో బీఆర్ఎస్ వర్కింగ్ ప్రెసిడెంట్ కేటీఆర్ ముఖ్యమంత్రి రేవంత్ రెడ్డికి లేఖ రాశారు. గత బీఆర్ఎస్ ప్రభుత్వంపై కాంగ్రెస్ నేతలు చేస్తున్న ఆరోపణలను నిరసిస్తూ అసెంబ్లీలో చర్చించాలని డిమాండ్ చేశారు. తాము చేపట్టిన ఈ-రేస్ ఆర్థిక లాభాలు, పారదర్శకతపై నమ్మకముంటే, అసెంబ్లీ వేదికగా వివరణ ఇవ్వడానికి సిద్ధంగా ఉన్నామని తెలిపారు.
ఈ-రేస్ రాష్ట్రానికి 700 కోట్ల రూపాయల ఆర్థిక లబ్ధి చేకూర్చిందని నీల్సన్ సంస్థ నివేదిక ఆధారంగా కేటీఆర్ పేర్కొన్నారు. ఈ రేస్ వల్ల తెలంగాణ ప్రతిష్ఠ పెరిగిందని, ప్రపంచస్థాయి ఈవెంట్ విజయవంతంగా నిర్వహించామని చెప్పారు. అయితే కాంగ్రెస్ ప్రభుత్వం ఈ రేస్‌ను రద్దు చేయడమే కాకుండా అనవసర ఆరోపణలు చేస్తోందని ఆవేదన వ్యక్తం చేశారు. అసత్య ప్రచారాల ద్వారా ప్రజలను తప్పుదారి పట్టించే ప్రయత్నం జరుగుతోందని విమర్శించారు.
తాజా కేబినెట్ సమావేశంలో ఈ అంశంపై చర్చ జరిగినా, ప్రజలకు పూర్తిస్థాయి సమాచారం అందించాల్సిన అవసరం ఉందని కేటీఆర్ అభిప్రాయపడ్డారు. అసెంబ్లీలో చర్చ జరిగితే ప్రభుత్వ చర్యలు పారదర్శకంగా బయటపడతాయని, కాంగ్రెస్ నిరాధార ఆరోపణలు బహిర్గతమవుతాయని అన్నారు. బీఆర్ఎస్ ఎమ్మెల్యేలు ఇప్పటికే స్పీకర్‌కు లేఖ రాశారని, దీని ఆధారంగా సభలో చర్చ చేపట్టాలని కేటీఆర్ విజ్ఞప్తి చేశారు.
రాజకీయ కక్ష సాధింపుతోనే ఈ-రేస్ విషయంలో అసత్య ఆరోపణలు వచ్చాయని, ప్రజలకు నిజాలను తెలియజేయడం బాధ్యతగా భావిస్తున్నామని కేటీఆర్ పేర్కొన్నారు. ఫార్ములా ఈ-రేస్ నిర్వహణ పూర్తిగా పారదర్శకంగా జరిగిందని, అసెంబ్లీలో చర్చించడానికి తాము సిద్ధంగా ఉన్నామని చెప్పారు.