ప్రస్తుత రోజుల్లో కాలంతో సంబంధం లేకుండా..ప్రతి ఇంట్లో ఫ్రిజ్ని ఉపయోగిస్తున్నారు. ఎండలో తాపానికి, మట్టి వాసన వర్షానికి… శరీరాన్ని శాంతిపరిచేది చల్లటి నీరు. అందుకే చిన్నవారి నుంచి పెద్దవరైనా చల్లని నీరు తాగడాన్ని ఇష్టపడతారు. అయితే చల్లటి నీటిని నిల్వచేయడానికి ఏ సీసా బెటర్..? ఏది ఆరోగ్యానికి మంచిది? ఏది దూరంగా ఉంచాలి? అనే విషయాలు ఎక్కువ మందికి క్లారిటీగా ఉండవు. ఈ కథనంలో దాని గురించి తెలుసుకుందాం.
ప్లాస్టిక్ బాటిల్: చాలామంది సరళత కోసం రంగురంగుల ప్లాస్టిక్ సీసాలను ఎక్కువగా వాడుతున్నారు. ఇవి చౌక, తేలిక, అందులో నీరు తాగడానికి సౌకర్యంగా ఉంటాయి. కానీ ప్లాస్టిక్ సీసాల్లో నీరు నిల్వచేయడం సురక్షితమా… అంటే నిపుణులు అభిప్రాయం ప్రకారం అది అంత మంచిదికాదని. ఎందుకంటే చాలా ప్లాస్టిక్ సీసాల్లో BPA అనే రసాయనం వుంటుంది. ఇది ఎక్కువ కాలం చల్లగా, వేడి పరిస్థితుల్లో నీటిలోకి కలిసే ప్రమాదం ఉంటుంది. దీని ప్రభావం శరీరానికి హానికరం అవుతుంది. పైగా నీటికి వింత రుచి కూడా వస్తుంది.
స్టీల్ బాటిల్: మరోవైపు స్టీల్ సీసాలు ఇప్పుడు ట్రెండ్. స్టీల్ బాటిళ్లు మన్నికైనవి, రుచి మారదు, రసాయనమూ ఉండదు. దీని వల్ల ఆరోగ్యానికి నష్టం తక్కువ. డాక్టర్లు కూడా ప్లాస్టిక్ కంటే స్టీల్ బాటిళ్లను ప్రిఫర్ చేస్తారు. కానీ లోహ బాటిళ్లతో ఎలాంటి అదనపు పోషకాలు లభించవు. అయినప్పటికీ ప్లాస్టిక్ బాటిళ్ల కంటే స్టీల్ సేఫ్.
ఇంకా ఒక గొప్ప ఎంపిక ఏదంటే రాగి సీసాలు. మన ఆయుర్వేదం రాగి సీసాలలో నిల్వచేసిన నీరు శరీరానికి విరివిగా ఉపయోగపడుతుందని చెబుతోంది. రాగి సీసాలో నిల్వ చేసిన నీరు శరీరాన్ని డీటాక్స్ చేసి, ఇమ్యూనిటీని పెంచుతుంది. కానీ ప్రతి ఒక్కరికి రాగి సీసా ఎప్పుడూ అందుబాటులో ఉండదు.
గాజు బాటిల్: మరోవైపు గాజు సీసాలు కూడా చాలా మంది ఇష్టపడుతున్నారు. ఎందుకంటే ఇవి 100% రసాయన రహితం. అందులో ఉంచిన నీరు స్వచ్ఛంగా, రుచిగా ఉంటుంది. ఏ రుచి మార్పు ఉండదు. కానీ గాజు సీసా జాగ్రత్తగా వాడాలి. చిన్న పొరపాటు జరిగితే విరిగిపోతుంది. అందుకే ఎక్కువగా ఇంట్లో వాడతారు, బయటకు తీసుకెళ్ళరు.
ఇంట్లో ఫ్రిజ్లో మాత్రమే నిల్వ చేయడానికి గాజు సీసా సురక్షితం. బయటకు తీసుకెళ్ళాలి, ఎక్కడైనా తేలికగా వాడాలి అనుకుంటే స్టీల్ సీసా సరైనది. రాగి సీసా కూడా ఆరోగ్యానికి బాగా ఉపయోగపడుతుంది. ప్లాస్టిక్ సీసా తప్పనిసరిగా వాడాలి అంటే BPA ఫ్రీ సర్టిఫైడ్ సీసాలను మాత్రమే ఎంచుకోవాలి.
ఇంతకీ ఫ్రిజ్లో బాటిల్కి కూడా జాగ్రత్తలు అవసరమే. ఫ్రిజ్లో ఏ సీసా పెట్టాలో, దానివల్ల వచ్చే ఆరోగ్య ప్రభావాలేంటో తెలుసుకొని వాడితే మనకూ, మన కుటుంబానికీ మంచిదే. సింపుల్గా గాజు, స్టీల్ బాటిళ్లు ఆరోగ్యానికి స్నేహపూర్వకంగా ఉంటాయి. ప్లాస్టిక్ తప్పనిసరిగా ఉంటే BPA రహిత సీసాలను మాత్రమే ఎంచుకోండి. మనం తాగే ప్రతి నీటి చుక్క కూడా ఆరోగ్యానికి మంచిదే అవ్వాలి కాబట్టి సరైన నిర్ణయం తీసుకోండి.