రానున్న నాలుగు రోజులు రెండు తెలుగు రాష్ట్రాలపై వర్షాల బీభత్సం కమ్ముకోనుంది. ఆగ్నేయ బంగాళాఖాతంలో ప్రస్తుతం కొనసాగుతున్న ఉపరితల ఆవర్తనం మంగళవారం నాటికి అల్పపీడనంగా, ఆపై వాయుగుండంగా మారే అవకాశం ఉండటంతో వాతావరణ శాఖ అత్యవసర హెచ్చరికలు జారీ చేసింది. దీని ప్రభావంతో అక్టోబర్ 20 నుంచి 23 వరకు ఆంధ్రప్రదేశ్, తెలంగాణ రాష్ట్రాల అనేక జిల్లాల్లో భారీ వర్షాలు కురిసే అవకాశముందని వాతావరణ కేంద్రాలు స్పష్టంచేశాయి.
విపత్తుల నిర్వహణ సంస్థ (డీఎమ్ఏ) ప్రకారం, ఆంధ్రప్రదేశ్లో అక్టోబర్ 20న బాపట్ల, ప్రకాశం, నెల్లూరు, చిత్తూరు, తిరుపతి జిల్లాల్లో వర్షాలు పడే అవకాశం ఉంది. 21న పశ్చిమగోదావరి, ఏలూరు, కృష్ణా, ప్రకాశం, నెల్లూరు, చిత్తూరు, తిరుపతి జిల్లాలు ప్రభావితమవుతాయని అంచనా. 22న బాపట్ల, ప్రకాశం, నెల్లూరు, తిరుపతి జిల్లాల్లో భారీ వర్షాల సూచన ఉంది. అత్యధిక వర్షపాతం అక్టోబర్ 23న ఉండే అవకాశం ఉంది. ఆ రోజున డాక్టర్ బీఆర్ అంబేడ్కర్ కోనసీమ, తూర్పుగోదావరి, పశ్చిమగోదావరి, కృష్ణా, బాపట్ల, ప్రకాశం, నెల్లూరు, తిరుపతి జిల్లాలు అత్యధికంగా ప్రభావితమవుతాయని విపత్తుల నిర్వహణ సంస్థ పేర్కొంది.
ఇక తెలంగాణలో కూడా పరిస్థితి భిన్నంగా ఉండదని వాతావరణ శాఖ హెచ్చరించింది. సోమవారం, మంగళవారం రోజుల్లో ఉరుములు, మెరుపులు, ఈదురుగాలులతో కూడిన వానలు కురిసే అవకాశం ఉందని India Meteorological Department హైదరాబాదు కేంద్రం ఎల్లో అలెర్ట్ జారీ చేసింది. ప్రత్యేకించి అక్టోబర్ 23న కరీంనగర్, పెద్దపల్లి, భూపాలపల్లి, ములుగు, ఖమ్మం, నల్గొండ, సూర్యాపేట, వరంగల్, హన్మకొండ, హైదరాబాద్ సహా 20కు పైగా జిల్లాల్లో విస్తృతంగా వర్షపాతం నమోదయ్యే అవకాశం ఉందని అధికారులు వెల్లడించారు. గడిచిన 24 గంటల్లోనే ఖమ్మం, కొత్తగూడెం వంటి ప్రాంతాల్లో తేలికపాటి వర్షాలు నమోదయ్యాయి.
వాతావరణ శాఖ అంచనాల ప్రకారం, ఈ వాయుగుండం బలపడితే తీరప్రాంతాల్లో గాలుల వేగం గంటకు 45 నుండి 55 కిలోమీటర్ల వరకు ఉండే అవకాశం ఉంది. మత్స్యకారులు సముద్రయాత్రలకు వెళ్లకూడదని ఇప్పటికే హెచ్చరికలు జారీ చేయబడ్డాయి. తీరప్రాంత గ్రామాల్లో అధికారులు అలర్ట్లోకి వెళ్లారు. లోతట్టు ప్రాంతాల్లో నీరు చేరే అవకాశం ఉండటంతో, అక్కడి ప్రజలు జాగ్రత్తలు తీసుకోవాలని సూచించారు.
రైతులు ప్రత్యేకంగా అప్రమత్తంగా ఉండాలని, పంటలు కోతకు సిద్ధంగా ఉన్న చోట వాటిని సురక్షితంగా ఉంచుకోవాలని అధికారులు సూచిస్తున్నారు. వర్షాలు ఉధృతంగా కురిసే అవకాశం ఉండటంతో విద్యుత్ సమస్యలు, రవాణా అంతరాయం, చెరువులు, వాగులు పొంగిపొర్లే పరిస్థితులు తలెత్తవచ్చని హెచ్చరించారు. అవసరమైతే తాత్కాలిక శిబిరాలు కూడా సిద్ధం చేయాలని స్థానిక యంత్రాంగం సన్నద్ధమవుతోంది. ప్రస్తుతం వాయుగుండం ఇంకా బలపడే దశలో ఉండటంతో, పరిస్థితిపై వాతావరణ శాఖ నిరంతర నిఘా ఉంచుతోంది. ప్రజలు అధికారిక సూచనలను జాగ్రత్తలు పాటిస్తే ప్రమాదాలు తప్పవచ్చని విపత్తుల నిర్వహణ సంస్థ సూచించింది.