జమ్మూ కశ్మీర్‌లోని పహల్గాంలో అమాయక పర్యాటకులపై జరిగిన ఉగ్రదాడి ఘటన దేశవ్యాప్తంగా తీవ్రంగా కలిచివేసిన సంగతి తెలిసిందే. ఈ దారుణ ఘటనకు ప్రతిస్పందనగా కేంద్ర ప్రభుత్వం కఠిన చర్యలు తీసుకునే దిశగా అడుగులు వేస్తోంది. ముఖ్యంగా దేశంలో ఉన్న పాకిస్థాన్ పౌరులపై కేంద్ర హోం మంత్రిత్వ శాఖ కీలక నిర్ణయం తీసుకుంది.
ఈ మేరకు కేంద్ర హోంమంత్రి అమిత్ షా అన్ని రాష్ట్రాల ముఖ్యమంత్రులతో టెలిఫోన్‌లో సంప్రదింపులు జరిపారు. తమ రాష్ట్రాల్లో ఉన్న పాకిస్థాన్ పౌరులను గుర్తించి, వారిని వెంటనే వెనక్కి పంపేందుకు తగిన చర్యలు చేపట్టాలని ఆయన ఆదేశించారు. ఉగ్రవాద దాడుల నేపథ్యంలో ఈ నిర్ణయం తీసుకోవాల్సిన అవసరం ఉందని షా పేర్కొన్నారు.
భారతదేశంలో ప్రస్తుతం ఉన్న పాకిస్థాన్ జాతీయుల వీసాలను రద్దు చేసే ప్రక్రియను వేగవంతంగా చేపట్టాలని రాష్ట్ర ప్రభుత్వాలను కేంద్ర హోంశాఖ కోరినట్టు సమాచారం. ఈ నెల 27వ తేదీ వరకు ఉన్న వీసాలన్నీ రద్దయ్యే అవకాశం ఉందని కేంద్రం స్పష్టం చేసింది. ముఖ్యంగా వైద్య కారణాలతో భారత్‌లో ఉన్న పాకిస్థానీయులు కూడా ఈ నిర్ణయానికి లోబడే అవకాశం ఉంది.
ఇప్పటికే పాకిస్థాన్‌తో అన్ని రకాల ద్వైపాక్షిక సంబంధాలను పునఃపరిశీలిస్తున్న కేంద్రం, టూరిజం, వాణిజ్య అంశాలపైనా పరిమితులు విధించే దిశగా దృష్టిసారించింది. పాకిస్థాన్‌లో ఉగ్రవాద సంస్థలకు ప్రభుత్వ అండ ఉన్నట్లు భారత ఇంటెలిజెన్స్ వర్గాలు చెబుతున్న తరుణంలో, ఈ నిర్ణయానికి భారీ ప్రాధాన్యత ఉంది.
ఈ చర్యతో దేశంలోని పాక్ పౌరుల కదలికలపై పర్యవేక్షణ మరింత కఠినతరం కానుంది. ఉగ్రవాద కార్యకలాపాలకు మార్గం తొడగకుండా ముందస్తు చర్యలుగా ఈ నిర్ణయాన్ని కేంద్రం తీసుకున్నట్టు విశ్లేషకులు అభిప్రాయపడుతున్నారు. ఇక వీసాలు రద్దయిన తరువాత పాక్ పౌరుల కదలికలపై మరింత నియంత్రణ ఉండేలా కేంద్రం చర్యలు చేపట్టనుంది.
