‘సాహో’ డిజిటల్ రైట్స్.. ప్రభాస్ పవర్ ఏంటో చూపించాడు
యంగ్ రెబల్ స్టార్ ప్రభాస్ హీరోగా సుజిత్ డైరక్షన్ లో 300 కోట్ల భారీ బడ్జెట్ తో వస్తున్న సినిమా సాహో. యువి క్రియేషన్స్ బ్యానర్ లో వస్తున్న ఈ సినిమాలో ప్రభాస్ కు జోడీగా బాలీవుడ్ భామ శ్రద్ధా కపూర్ నటిస్తోంది. హాలీవుడ్ తరహాలో యాక్షన్ సీన్స్ తో వస్తున్న సాహో ట్రైలర్, మేకింగ్ వీడియోస్ తో సినిమాపై అంచనాలు పెంచారు. బాహుబలి తర్వాత జాతీయ స్దాయిలో ఫాలోయింగ్ ఏర్పరచుకున్న ప్రభాస్ సాహోతో మరోసారి సత్తా చాటాలని చూస్తున్నాడు.
ఈ నేపధ్యంలో ఈ సినిమా డిజిటల్ రైట్స్ భారీ రేటుకు అమ్ముడైనట్లు తెలుస్తోంది. అందుతున్న సమాచారం మేరకు అమెజాన్ ప్రైమ్ వారు 42 కోట్లకు తెలుగు,తమిళ,మళయాళ భాషల డిజిటల్ రైట్స్ ని కొనుగోలు చేసారు. ఈ స్దాయి రేటు పలకటం తెలుగు సినిమా చరిత్రలోనే తొలి సారి కావటం విశేషం.
ఇంతకాలం తెలుగు సినిమాల డిజిటల్ రైట్స్ కేవలం 20 కోట్ల లోపే ఉండేవి కాని బాహుబలితో సీన్ మారింది. తెలుగు సినిమా స్థాయి ఏంటో రాజమౌళి చూపించాడు. దానికి కొనసాగింపుగా వస్తున్న ప్రభాస్ సాహో కచ్చితంగా అంచనాలకు తగినట్టుగా ఉంటుందని అంటున్నారు.
ఈ సినిమాతో ప్రభాస్ మరోసారి బాక్సాఫీస్ పై తన పంజా విసరనున్నాడు. ప్రీ రిలీజ్ బిజినెస్ ఇప్పటికే భారీ గా జరిగిందని తెలుస్తుంది. సాహో సినిమా 2019 ఆగష్టు 30 న ప్రపంచ వ్యాప్తంగా రిలీజ్ కాబోతుంది.