హిందూ సంప్రదాయంలో వాస్తు శాస్త్రానికి ప్రత్యేకమైన స్థానం ఉంది. ఇంట్లో శాంతి, ఆరోగ్యం, సంపద నిలవాలంటే రోజువారీ జీవనశైలిలో చిన్న చిన్న మార్పులు చాలు అని వాస్తు నిపుణులు చెబుతుంటారు. ముఖ్యంగా నిద్రించే సమయంలో చేసే కొన్ని చర్యలు మన జీవితంపై ప్రభావం చూపుతాయని నమ్మకం. అందులో భాగంగానే ఇప్పుడు ఒక సులభమైన కానీ ఆసక్తికరమైన పరిహారం గురించి చర్చ జరుగుతోంది.
సాధారణంగా రాత్రి పడుకునేటప్పుడు చాలామంది సెల్ఫోన్, నీళ్ల బాటిల్ దగ్గర పెట్టుకుని నిద్రిస్తుంటారు. కానీ వాస్తు శాస్త్రం ప్రకారం దిండు కింద ఒక రూపాయి నాణెం పెట్టుకుని నిద్రించడం వల్ల అనేక లాభాలు కలుగుతాయని పండితులు చెబుతున్నారు. చిన్న నాణెం అయినా దాని వెనుక ఉన్న ఆధ్యాత్మిక భావన మాత్రం ఎంతో పెద్దదిగా భావిస్తారు.
వాస్తు ప్రకారం రూపాయి నాణెం లక్ష్మీ దేవి అనుగ్రహానికి ప్రతీకగా పరిగణిస్తారు. దాన్ని నిద్ర సమయంలో దిండు కింద ఉంచడం వల్ల నెగిటివ్ ఎనర్జీ ప్రభావం తగ్గి, పాజిటివ్ ఎనర్జీ పెరుగుతుందని విశ్వాసం. దీని వల్ల మనస్సుకు ప్రశాంతత కలిగి, అనవసరమైన భయాలు, ఆందోళనలు దూరమవుతాయని అంటున్నారు.
ఇక ఆరోగ్య పరంగా కూడా ఈ పరిహారం ఉపయోగకరంగా ఉంటుందని నమ్మకం. నిద్రలో వచ్చే కలతలు తగ్గి, శరీరానికి మంచి విశ్రాంతి లభిస్తుందని చెబుతారు. అలాగే తరచూ ఎదురయ్యే అనారోగ్య సమస్యలు క్రమంగా తగ్గుతాయని వాస్తు నిపుణుల అభిప్రాయం. నిద్ర నాణ్యత మెరుగుపడటం వల్ల రోజువారీ పనుల్లో ఉత్సాహం పెరుగుతుందని అంటున్నారు.
ఆర్థిక సమస్యలతో ఇబ్బంది పడేవారికి ఈ పరిహారం మరింత ప్రయోజనకరమని చెబుతున్నారు. దిండు కింద రూపాయి నాణెం పెట్టుకుని నిద్రించడం వల్ల ఇంట్లో డబ్బు నిలవడం, అనవసర ఖర్చులు తగ్గడం జరుగుతుందని విశ్వాసం. ముఖ్యంగా అప్పులు, ఆర్థిక ఒత్తిడి ఎదుర్కొంటున్న వారు ఈ విధానాన్ని నెలకు ఒకసారి పాటిస్తే మంచి ఫలితాలు వస్తాయని కొందరు నమ్ముతున్నారు.
ఈ పరిహారాన్ని ఎలా చేయాలంటే, ప్రతి నెలలో ఒక రాత్రి పడుకునే ముందు శుభ్రమైన ఒక రూపాయి నాణాన్ని దిండు కింద పెట్టుకుని నిద్రించాలి. మరుసటి రోజు ఉదయం ఆ దానిని తీసి పారే నది, చెరువు లేదా నీటిలో వదిలేయాలని వాస్తు శాస్త్రం సూచిస్తుంది. ఇలా చేయడం వల్ల ధనలాభం, శుభ ఫలితాలు కలుగుతాయని పండితులు చెబుతున్నారు.