‘ఆ వాహనంతో మాకేంటి సంబంధం.?’ అని ఊరుకోవాల్సిన వైఎస్సార్ కాంగ్రెస్ పార్టీ, జనసేనాని వినియోగించనున్న వారాహి వాహనానికి విపరీతమైన పబ్లిసిటీ ఇచ్చింది. అక్కడికేదో జనసేన పార్టీకి వైసీపీ నేతలు స్టార్ క్యాంపెయినర్లన్న తరహాలో హంగామా నడిచింది. అంతే మరి, సోషల్ మీడియాలో ఓ వీడియోను జనసేనాని పోస్ట్ చేస్తే, వైసీపీ మంత్రులు అంతలా ఉలిక్కిపడాలా.?
అయ్యిందేదో అయిపోయింది.! ఇక్కడితో అయినా ‘వారాహి’ వివాదాన్ని వైసీపీ మర్చిపోతుందా.? అంటే, లేనే లేదు. ఇంకా ఇంకా వైసీపీ నేతలు ‘వారాహి’ గురించి మాట్లాడుతూనే వున్నారు. నిజానికి, జనసేన నేతలెప్పుడో ఆ వారాహి గురించి మర్చిపోయారు. పవన్ కళ్యాణ్ తన సినిమా పనుల్లో తాను బిజీ అయిపోయారు.
వైసీపీ నేతలే ఇంకా వారాహిని పట్టుకుని వేలాడుతున్నారు. ఎక్కడిదాకా ఈ వారాహి వివాదం వెళుతుందట.? బహుశా, 2024 ఎన్నికలు జరిగేదాకా ఈ వారాహి రగడ కొనసాగేలానే వుంది. ఎందుకంటే, వారాహి త్వరలోనే ఆంధ్రప్రదేశ్ రాష్ట్రంలో అడుగు పెట్టనుంది. ఆ తర్వాత అసలు కథ మొదలవుతుంది.
వైట్ నెంబర్ ప్లేట్‌తో ఈ వాహనానికి రిజిస్ట్రేషన్ జరిగినట్లు తెలంగాణ రవాణా శాఖ అధికారులు చెబుతున్నారు. అంటే, దేశంలో ఏ రాష్ట్రంలోనూ ఈ వాహనానికి ఇబ్బందులు వుండకూడదు. కానీ, మా రాష్ట్రం వేరు.. మా నిబంధనలు వేరు.. అంటున్నారు ఆంధ్రప్రదేశ్ మంత్రి గుడివాడ అమర్నాథ్. అసలు అలాంటి నిబంధనలు ప్రత్యేకంగా రవాణా శాఖకు సంబంధించి ఏ రాష్ట్రంలో అయినా వుంటాయా.? ఏపీలో తెలంగాణ వాహనాన్ని అడ్డుకుంటే, తెలంగాణలో ఏపీ వాహనాల్ని అడ్డుకోవాల్సి వస్తుందేమో.! అక్కడిదాకా పరిస్థితిని వైసీపీ తీసుకెళుతుందా.? అంటే, ఏమో.. ఏమైనా జరగొచ్చు.