ఏపీ రాజకీయాల్లో ఆఫ్టర్ ఎ స్మాల్ గ్యాప్ మరోసారి ‘సూపర్ సిక్స్’ హామీలపై చర్చ మొదలైంది. అందుకు కారణం… ఉగాది రోజున నిరుద్యోగులకు రాష్ట్ర ప్రభుత్వం తీపికబురు అందించిందని, ఇందులో భాగంగా.. 10,060 పోస్టులతో జాబ్ క్యాలెండర్ ను విద్య, ఐటీ శాఖల మంత్రి నారా లోకేష్ విడుదల చేశారని ఓ పార్టీ అనుకూల మీడియా ప్రచురించగా… అధికారంలోకి రాగానే 20 లక్షల మందికి ఉద్యోగాలిస్తామని ఎన్నికల వేళ కూతలు కూశారని.. ఏటా 75 వేల మంది ఉద్యోగ అర్హత కోల్పోతున్నా పట్టించుకోకుండా కొత్త కొత్త డ్రామాలకు తెరలేపుతున్నారని మరో వర్గం మీడియా మండిపడింది! తాజా ప్రభుత్వ ప్రకటన తీపి మాటున దాగిఉన్న కఠిక చేదు అని వెల్లడించింది. ఈ సమయంలో నిరుద్యోగ భృతి విషయం తెరపైకి రావడం గమనార్హం.
ఏపీలో ఎన్నికల సమయంలో కూటమిలోని టీడీపీ ప్రధానంగా సూపర్ సిక్స్ అంటూ ఆరు హామీలను ఇచ్చిన సంగతి తెలిసిందే. అవి వైసీపీ నవరత్నాలు, కర్ణాటక కాంగ్రెస్ ఇచ్చిన హామీలను నుంచి కాపీ కొట్టినవే అనే చర్చ జరిగినప్పటికీ.. వాటిని ఏపీ ప్రజానికం బలంగా నమ్మిందనే చెప్పాలి. వాలంటీర్ ఉద్యోగాలు ఉంచడంతోపాటు జీతం 10వేలకు పెంచే హామీల వంటివి కూడా కూటమి విజయంలో కీలక భూమిక పోషించాయని అంటారు. కట్ చేస్తే… అధికారంలోకి వచ్చిన తర్వాత చంద్రబాబు తనదైన శైలిలో అన్నట్లుగా మాట మార్చారు! జీతం పెంచడం సంగతి దేవుడెరుగు.. వాలంటీర్ల ప్రస్థావనే లేకుండా చేసి, సక్సెస్ అయ్యారు!! దీనిపై కొన్ని రోజులు ఆ వాలంటీర్లు నిరసన తెలిపినా.. ఆ తర్వాత చల్లబడిన పరిస్థితి!
వాస్తవానికి ఏపీలో కూటమి ప్రభుత్వం కొలువుదీరిన తర్వాత ఓ ఏడాది ఇబ్బంది పెట్టినా.. ఆ తర్వాత స్కూలుకి వెళ్లే ప్రతీ విద్యార్థికి ఏడాదికి రూ.15,000.. ప్రతి ఇంటికీ ఉచితంగా ఏడాదికి మూడు గ్యాస్ సిలెండర్లు.. మహిళలకు ఉచిత ఆర్టీసీ బస్సు ప్రయాణం వంటి హామీలు నెరవేర్చింది.. కాకపోతే ‘కండిషన్స్ అప్లై’ అనే ‘స్టార్’ సింబల్ అధికారంలోకి వచ్చిన తర్వాత అప్లై చేసింది! కట్ చేస్తే… మిగిలిన హామీలపై ప్రభుత్వ పెద్దల నుంచి వినిపిస్తున్న కామెంట్లు ఏడ్వలేక నవ్వాల్సిన పరిస్థితిని సృష్టించాయి. ఉదాహరణకు ప్రతీ మహిళకు నెలకు రూ.1,500 హామీపై మంత్రి అచ్చెన్నాయుడు చేసిన వ్యాఖ్యలను పరిశీలించొచ్చు.
ఈ క్రమంలో తాజాగా జాబ్ క్యాలెండర్ అంటూ ఏపీ ప్రభుత్వం నుంచి ఉగాది రోజున ఓ ప్రకటన వెలువడటంతో.. వెంటనే సూపర్ సిక్స్ లోని ‘నిరుద్యోగ భృతి’ హామీపై చర్చ మొదలైంది. కూటమి అధికారంలోకి వస్తే యువతకు 20 లక్షల ఉపాధి అవకాశాలు.. లేదా, నెలకు రూ.3,000 నిరుద్యోగ భృతి ఇస్తామని చంద్రబాబు, పవన్, లోకేష్ బలంగా ప్రచారం చేశారు! ఈ హామీ విషయంలో 2014లో ఓసారి చంద్రబాబు చేతిలో ఏపీ యువత మోసపోయినప్పటికీ.. మరోసారి నమ్మారు.. బాబు కూడా మరోసారి కంటిన్యూ చేశారు!
ఏపీలో కూటమి ప్రభుత్వం అధికారంలోకి వచ్చి సుమారు 22 నెలలు అయ్యింది! అంటే ఒక్కో యువకుడికి ఇప్పటివరకూ సుమారు రూ.66,000 చొప్పున ప్రభుత్వం బాకీ పాడి ఉందన్నమాట! అయితే ప్రభుత్వం నుంచి ఈ హామీపై ఏ ఒక్కరూ నోరు మెదకపకుండా యువతను ముంచిన విషయాన్ని దాచే ప్రయత్నం చేస్తున్నారు! మరి ఇప్పటికైనా ఈ నిరుద్యోగ భృతి హామీ విషయంలో టీడీపీ ఫ్యూచర్ లీడర్ గా చెబుతోన్న లోకేష్ అయినా స్పందిస్తారా.. లేక, మోసం చేయడం తన తండ్రి నుంచి తనకు సంక్రమించిన ఓ ప్రత్యేక వరం అనే విమర్శలతో కూడిన చర్చకు అవకాశం ఇస్తారా అనేది వేచి చూడాలి!