ఆంధ్రప్రదేశ్‌లో వివిధ నియోజకవర్గాలకు నిధుల పంపిణీ ఇప్పుడు తీవ్ర రాజకీయ చర్చకు, అంతర్గత విభేదాలకు దారితీస్తోంది. రాష్ట్రంలో ఉన్న అన్ని నియోజకవర్గాలను సమానంగా చూడాల్సిన ప్రభుత్వం.. కేవలం ముగ్గురు అగ్రనేతల విఐపీ నియోజకవర్గాలైన మంగళగరి, కుప్పం, పిఠాపురంలపైనే నిధుల వర్షం కురిపిస్తోందంటూ సొంత పార్టీల ఎమ్మెల్యేల నుంచే తీవ్ర అసంతృప్తి వ్యక్తమవుతోంది. ఈ మూడు నియోజకవర్గాలకే వందలాది కోట్ల రూపాయల బడ్జెట్‌ను కేటాయిస్తూ, తమ ప్రాంతాలను పూర్తిగా విస్మరిస్తున్నారని ఇతర ఎమ్మెల్యేలు అంతర్గత సమావేశాల్లో బహిరంగంగానే తమ ఆవేదనను వెళ్లగక్కుతున్నారు.
రాష్ట్ర వాతావరణాన్ని పరిశీలిస్తే, విఐపీ నియోజకవర్గాలకు అందుతున్న ప్రాధాన్యత స్పష్టంగా కనిపిస్తోంది. ముఖ్యమంత్రి చంద్రబాబు నాయుడు ప్రాతినిధ్యం వహిస్తున్న కుప్పం నియోజకవర్గానికి మున్సిపల్ అర్బన్ ప్రాజెక్టులు, సమీకృత కాంక్లేవ్ కాంప్లెక్స్, కమాండ్ కంట్రోల్ రూమ్, మరియు పార్కుల సుందరీకరణ కోసం దాదాపు రూ. 70.20 కోట్ల కంటే ఎక్కువ ప్రత్యేక నిధులను ఒకేసారి వరాల జల్లులా ప్రకటించారు. అలాగే, డిప్యూటీ సీఎం పవన్ కళ్యాణ్ ప్రాతినిధ్యం వహిస్తున్న పిఠాపురం, మంత్రి నారా లోకేష్ నియోజకవర్గమైన మంగళగిరి పరిధిలోని ఏరియా హాస్పిటల్స్‌ను వంద పడకల మల్టీ స్పెషాలిటీ ఆసుపత్రులుగా అప్‌గ్రేడ్ చేయడానికి కోట్లాది రూపాయల ప్రత్యేక బడ్జెట్‌ను ప్రభుత్వం తక్షణమే విడుదల చేసింది.
మౌలిక సదుపాయాలు, రోడ్లు, డ్రైనేజీ ప్రాజెక్టుల పేరిట ఈ మూడు నియోజకవర్గాలకే ప్రాధాన్యత ఇస్తూ నిధుల డైవర్షన్ జరుగుతోందనేది ప్రధాన ఆరోపణ. ఈ విఐపీ నియోజకవర్గాల బడ్జెట్ కేటాయింపుల లెక్కలు చూసి ఇతర ప్రాంతాల ఎమ్మెల్యేలు జీర్ణించుకోలేకపోతున్నారు. ఎందుకంటే, ఒకవైపు రాష్ట్ర బడ్జెట్‌లో విద్యా, వైద్య, సామాజిక రంగాలకు భారీ వ్యయం చూపిస్తున్నప్పటికీ, క్షేత్రస్థాయిలో సామాన్య ఎమ్మెల్యేల నియోజకవర్గాల్లో కనీసం రోడ్ల గుంతలు పూడ్చడానికి, తాగునీటి పైపులైన్ల మరమ్మతులకు కూడా నిధులు మంజూరు కావడం లేదు.
“జనం ఓట్లేసి మమ్మల్ని గెలిపించింది కేవలం విఐపీ నియోజకవర్గాల అభివృద్ధిని చూసి చప్పట్లు కొట్టడానికేనా? మా నియోజకవర్గాల్లో పనులు జరగకపోతే వచ్చే స్థానిక సంస్థల ఎన్నికల్లో ప్రజలకు మేము ఏం సమాధానం చెప్పాలి?” అని పలువురు సీనియర్ ఎమ్మెల్యేలు సైతం అధిష్టానాన్ని ప్రశ్నిస్తున్నట్లు సమాచారం. మరోవైపు, ఈ అంతర్గత అసంతృప్తిని ప్రతిపక్ష వైఎస్సార్ కాంగ్రెస్ పార్టీ తమకు అనుకూలంగా మార్చుకుంటోంది. ఉత్తర కోస్తా, రాయలసీమ మరియు ప్రకాశం లాంటి వెనుకబడిన ప్రాంతాల అభివృద్ధికి కేటాయించిన ప్రత్యేక నిధులు ఎటు పోతున్నాయని విమర్శిస్తోంది. కూటమి ప్రభుత్వం రాష్ట్ర సమగ్ర అభివృద్ధిని కాకుండా.. కేవలం ముగ్గురు నేతల ఇమేజ్ పెంచుకోవడానికే ప్రజాధనాన్ని వాడుకుంటోందని ధ్వజమెత్తుతోంది. సొంత పార్టీ ఎమ్మెల్యేల నుంచే తిరుగుబాటు వస్తున్న ఈ నిధుల వివక్షపై ముఖ్యమంత్రి చంద్రబాబు నాయుడు తక్షణమే సమీక్ష నిర్వహించి, అన్ని నియోజకవర్గాలకు సమానంగా నిధులు కేటాయించకపోతే.. రాబోయే రోజుల్లో కూటమిలో ఈ ముసలం మరింత పెరిగే ప్రమాదం ఉందని రాజకీయ విశ్లేషకులు హెచ్చరిస్తున్నారు.