కొన్ని రోజులుగా సోషల్ మీడియాలో చక్కర్లు కొట్టిన ఊహాగానాలకు ఎట్టకేలకు తెరపడింది. నాగచైతన్యతో విడాకుల తర్వాత సమంత జీవితంలో కొత్త అధ్యాయం మొదలైనట్లు ఆమె స్వయంగా ధృవీకరించడంతో అభిమానులు ఒక్కసారిగా ఆశ్చర్యానికి గురయ్యారు. ప్రముఖ దర్శకుడు–నిర్మాత రాజ్ నిడిమొరుతో సమంత వివాహ బంధంలోకి అడుగు పెట్టినట్లు తాజాగా ఇన్స్టాగ్రామ్ ద్వారా వెల్లడైంది. కోయంబత్తూరులోని ఈషా యోగా సెంటర్లో లింగ భైరవి ఆలయంలో అత్యంత సన్నిహితులు, కుటుంబ సభ్యుల సమక్షంలో ఈ వివాహం సంప్రదాయబద్ధంగా జరిగినట్లు తెలుస్తోంది.
సమంతనే స్వయంగా పెళ్లి ఫొటోలను షేర్ చేయడంతో నెట్టింట ఈ జంటకు శుభాకాంక్షల వర్షం కురుస్తోంది. సినీ ప్రముఖులు, అభిమానులు ‘హ్యాపీ మ్యారేజ్ లైఫ్’ అంటూ విషెస్ చెబుతున్నారు. వీరిద్దరికీ ఇది రెండో వివాహం కావడం కూడా ఈ వార్తలో ప్రత్యేకంగా నిలుస్తోంది. కెరీర్లో బిజీగా ఉన్న సమయంలో సమంత ఈ నిర్ణయం తీసుకోవడం అభిమానులకు ఊహించని సర్ప్రైజ్గా మారింది.
అయితే ఈ సంతోషకర వార్త వెలువడిన కొద్ది గంటలకే మరో అంశం సోషల్ మీడియాలో పెద్ద చర్చగా మారింది. రాజ్ నిడిమొరు మాజీ భార్య శ్యామలీ డి తన ఇన్స్టాగ్రామ్ స్టోరీలో పెట్టిన ఓ క్రిప్టిక్ పోస్ట్ ఇప్పుడు వైరల్ అవుతోంది. ఆమె “Desperate people do desperate things” అనే ఇంగ్లీష్ కోట్ను ఎవరికీ ట్యాగ్ చేయకుండా పోస్ట్ చేయడం నెటిజన్లను ఆలోచనలో పడేసింది. ఈ పదాలను ఎవరిని ఉద్దేశించి పెట్టిందన్నది ప్రస్తుతం హాట్ టాపిక్గా మారింది.
రాజ్, శ్యామలీ ఇద్దరూ గతంలో విడాకులు తీసుకున్నప్పటికీ, వారి మధ్య వివాదాలు పూర్తిగా ముగియలేదన్న అభిప్రాయం సోషల్ మీడియా వర్గాల్లో వినిపిస్తోంది. తాజాగా శ్యామలీ చేసిన ఈ పోస్ట్ కూడా అదే కోణంలోకి నెట్టేసిందని నెటిజన్లు భావిస్తున్నారు. ఇదిలా ఉండగా, రాజ్పై ఇటీవల ఓ మహిళ చేసిన లైంగిక వేధింపుల ఆరోపణల వ్యవహారం ఇప్పటికే చర్చలో ఉన్న నేపథ్యంలో, ఈ పోస్ట్ మరింత ప్రాధాన్యత సంతరించుకుంది. అయితే ఇవన్నీ ప్రస్తుతం ఆరోపణల స్థాయిలోనే ఉన్నాయని, అధికారికంగా ఏ విషయంపైనా తుది నిర్ధారణ వెలువడలేదని గమనించాల్సిన విషయం.
ఈ మొత్తం వ్యవహారంపై రాజ్ నిడిమొరు గానీ, సమంత గానీ ఇప్పటివరకు ఎలాంటి స్పందన ఇవ్వలేదు. మరోవైపు శ్యామలీ డి గతంలో కూడా పలు సందర్భాల్లో సోషల్ మీడియా వేదికగా పరోక్ష వ్యాఖ్యలు చేస్తూ వార్తల్లో నిలిచారు. దీంతో విడాకుల తర్వాత కూడా ఈ మాజీ జంట పేరు తరచూ హెడ్లైన్స్లోనే కొనసాగుతోంది.
ఒకవైపు సమంత కొత్త జీవితం మొదలవుతుండగా, మరోవైపు ఈ వివాదాల గాలివాన సోషల్ మీడియాలో చర్చకు తావిస్తోంది. ఇంకా ఈ వ్యవహారం ఎటు దారి తీస్తుందో, రాజ్–సమంతల నుంచి ఎలాంటి అధికారిక క్లారిటీ వస్తుందో చూడాల్సిందే.