దేశవ్యాప్తంగా అత్యంత చర్చనీయాంశమైన 131వ రాజ్యాంగ సవరణ బిల్లు లోక్ సభలో వీగిపోయిన సంగతి తెలిసిందే. ఈ సందర్భంగా ఓ ఆసక్తికరమైన చర్చ దేశవ్యాప్తంగా మొదలైందని అంటున్నారు. ఇందులో భాగంగా… ఈ బిల్లు విషయంలో మోడీ & కో ఓవర్ కాన్ఫిడెన్స్ తో ఉన్నారని ఒకరంటే.. విపక్షాలను పరిగణలోకి తీసుకోకుండా ఇంతకాలం పాస్ అయిన బిల్లులుగానే ఇది కూడా అయిపోతుందని భావించారని మరొకరంటున్నారు.
మరోవైపు… ఈ బిల్లు విషయంలో మహిళా రిజర్వేషన్ బిల్లుకు తాము అడ్డు కాదని.. అందుకు తమంతా పూర్తి మద్దతు ప్రకటిస్తున్నామని చెబుతూ… 131వ రాజ్యాంగ సవరణ బిల్లు తీసుకురావడం వెనుక మోడీ & కో అసలు ఉద్దేశ్యాలు వేరని.. మహిళా రిజర్వేషన్ బిల్లును అడ్డుపెట్టి రాజకీయ లబ్ధి పొందేందుకు బీజేపీ ప్లాన్ చేసిందంటూ విపక్షాల వాయిస్ ని రాహుల్ గాంధీ బలంగా వినిపించారు. దీంతో… ఓ ఆసక్తికరమైన చర్చ తెరపైకి వచ్చింది.
అవును… డీలిమిటేషన్ బిల్లు వల్ల తొలిసారిగా మోడీ & కో కి పార్లమెంటులో గట్టి ఎదురుదెబ్బ తగిలిందని అంటున్నారు పరిశీలకులు. అందుకు ప్రధాన కారణం… వారు ఎప్పటిలాగానే నమ్ముకున్న మొండి విధానం అని చెబుతున్నారు. నిజంగా మహిళా రిజర్వేషన్ పై చిత్తశుద్ధి ఉంటే.. దానితోనే ముందుకు పోయి ఉండాల్సింది అని అంటున్నారు. దీంతోపాటు.. డీలిమిటేషన్ పై సభలో చెప్పిన విషయాలు, మైకుల ముందు చెబుతున్న అంశాలను బిల్లులో పొందుపరచకుండా ముసుగులో గుద్దులాట పద్దతి అవలంభించారని అంటున్నారు.
మూడు బిల్లులను ఒకేసారి తెర మీదకు తీసుకొచ్చి.. ఇప్పటికే పాస్ అయిన మహిళా బిల్లుకు సంబంధించిన కొంత మార్పులు చేసి.. మళ్లీ తెర మీదకు తీసుకొచ్చిన వైనం చూసినవారికి… మోడీ & కో మొండిగా ముందుకు వెళ్లేందుకు సిద్ధమైనట్లుందనే భావన పుష్కలంగా కలిగిందని చెబుతున్నారు. దీంతో… విపక్షాలకు పట్టింపు మరీ పెరిగిందనీ.. ఈ సమయంలో విపక్షాలకు పెద్దన్నగా రాహుల్ గాంధీ ముందుండి నడిపించిన విధానంతో.. రాజకీయంగా ఆయన గ్రాఫ్ మరింత పెరిగిందని చెబుతున్నారు.
రాహుల్ ఫైర్!
ప్రధానంగా లోక్ సభలో బిల్లు వీగిపోయిన అనంతరం మాట్లాడిన రాహుల్ గాంధీ.. తమ వైఖరిని మరింత స్పష్టంగా చెప్పే ప్రయత్నం చేస్తూనే… మహిళలపై బీజేపీకి ఉన్నది కపట ప్రేమ అనే విషయాన్ని తెరపైకి తేవడంలో సక్సెస్ అయ్యారనే కామెంట్లు వినిపిస్తున్నాయి. ఈ సందర్భంగా స్పందించిన ఆయన… మహిళలకు రిజర్వేషన్లు కల్పించడానికి కేంద్రం ఈ సవరణను తీసుకురాలేదని, మహిళా రిజర్వేషన్ బిల్లు ముసుగులో భారత ఎన్నికల ముఖచిత్రాన్ని మార్చే కుట్రకు తెరలేపిందని విమర్శించారు.
ఇదే సమయంలో… ఓబీసీలను, దళితులను హిందువులుగా చెప్పే బీజేపీ, అధికారంలో మాత్రం వారికి చోటివ్వడం లేదని.. ఓబీసీలు, దళితులు, మైనారిటీలకు చట్టసభల్లో ప్రాతినిధ్యం కల్పించడం అధికారపక్షానికి ఇష్టం లేదని.. అందుకే కులగణన పక్కన పెట్టేందుకు కేంద్రం ఈ బిల్లుల ద్వారా ప్రయత్నిస్తోందని.. భారత రాజ్యాంగం కంటే మనువాదానికే ఆ పార్టీ అధిక ప్రాధాన్యమిస్తోందని గ్యాప్ లేకుండా విరుచుకుపడ్డారు రాహుల్ గాంధీ.
అదేవిధంగా… మహిళలపై విపక్షాలకు గౌరవం లేదని.. మహిళలకు రిజర్వేషన్ కల్పించే విషయంలో వారికి చిత్తశుద్ధి లేదంటూ బీజేపీ నేతలు చేసిన విమర్శలకూ ఆయన గట్టి కౌంటర్ ఇచ్చే ప్రయత్నం చేశారు. ఇందులో భాగంగా.. ఇది అసలు మహిళా రిజర్వేషన్ బిల్లే కాదని.. 2023లో తీసుకువచ్చని మహిళా రిజర్వేషన్ బిల్లును తీసుకువస్తే దానికిపూర్తిగా మద్దతు ఇస్తామని చెబుతూనే.. రాజ్యాంగంపై జరిగిన దాడిని తాము సక్సెస్ ఫుల్ గా తిప్పికొట్టామని అన్నారు.
ఈ విధంగా మోడీ & కో మొండిగా అన్నట్లుగా తీసుకొచ్చిన రాజ్యాంగ సవరణ బిల్లు వీగిపోవడంపై రాహుల్ గాంధీ తనదైన వెర్షన్ వినిపిస్తూ.. తాము మహిళా రిజర్వేషన్ బిల్లుకు ఏనాడూ వ్యతిరేకం కాదని చెబుతూనే… ఆ బిల్లును ముందు పెట్టి డీలిమిటేషన్ ద్వారా రాజకీయ లబ్ధి పొందాలని ఆలోచించిన బీజేపీది, మహిళలపై కపట ప్రేమ అనే సందేశాన్ని బలంగా వినిపించారని అంటున్నారు పరిశీలకులు. ఈ నేపథ్యంలోనే… రాహుల్ లెవెల్ ని మోడీ & కో వెడల్పు చేశారని చెబుతున్నారు!
మోడీ, షా లను గిల్లుతూ…!
అలా అని పూర్తిగా తన వాయిస్ ని గంభీర స్వరంతోనే కంటిన్యూ చేయలేదు రాహుల్ గాంధీ. సాధారణంగా తనపై మోడీ, అమిత్ షా తో పాటు పలువురు బీజేపీ నేతలు సెటైర్లు వేసే వ్యాఖ్యలు చేసిన విషయాలను గుర్తుకు తెచ్చుకున్నారో ఏమో కానీ.. నేరుగా మోడీపైనా ఆసక్తికర వ్యాఖ్యలు చేశారు. కాకపోతే.. ఆ అంశంలో తననూ కలుపుకున్నారు.
ఇంతకూ రాహుల్ ఏమన్నారంటే… ఈ సభలో ఉన్న మనమందరం మన జీవితంలోని మహిళల నుంచి ఎంతగానో ప్రభావితులయ్యామని.. ఎన్నో విషయాలు నేర్చుకున్నామని అంటూ… మోడీకి, తనకూ భార్యలు లేరు కనుక మాకు వారి నుంచి సలహాలు లభించవని అన్నారు. అయితే తమకు తల్లులు, సోదరీమణులు ఉన్నారని అన్నారు. అనంతరం… కేంద్ర హోంమంత్రి అమిత్ షాను నవ్వించి, 20 ఏళ్ల రాజకీయ జీవితంలో తాను సాధించలేనిది తన సోదరి ప్రియాంక సాధించిందని రాహుల్ చమత్కరించారు.
దీంతో… దేశ రాజకీయాల్లో, పార్లమెంటు చరిత్రలోని అత్యంత కీలకమైన రోజుల్లో ఒకటైన ఏప్రిల్ 17న రాహుల్ గాంధీ సెంట్రాఫ్ అట్రాక్షన్ గా నిలిచారని చెబుతున్నారు!!