జనసైనికులకు, పవర్ స్టార్ అభిమానులకు… పవన్ కంటే పెద్ద హీరో లేరని ఫీలింగ్. ఒకవేళ ఉన్నప్పటికీ పవన్ క్రేజ్ ముందు వాళ్లంతా చిన్నోళ్లని వారి అభిప్రాయం. పైగా ఇండస్ట్రీలో కొత్తగా వచ్చిన ఎవరైనా వారు పవన్ ఫ్యాన్ అని చెప్పుకోవాలని తాపత్రయం. ఇలా పవన్ ఫ్యాన్స్ గురించి రకరకాల ప్రచారాలు జరుగుతుంటాయి. వాటిలో ఎంతోకొంతం వాస్తవం లేకపోలేదౌ అనేది కూడా వాస్తవమే.
ఈ సమయంలో పవన్ కొత్త స్లోగన్ అందుకున్నారు. ఫలితంగా తన ఫ్యాన్స్ ని హర్ట్ చేశారు. అవును… వచ్చే ఎన్నికల్లో ఎలాగైనా ఎమ్మెల్యే గెలిచి అసెంబ్లీలోకి అడుగు పెట్టాలని ఆశపడుతున్న జనసేన అధినేత పవన్ కళ్యాణ్… నిన్నటివరకూ తన ఫ్యాన్స్, తన కులం కేంద్రంగా రాజకీయాలు చేస్తున్నారని కామెంట్లు వచ్చాయి. అదిమాత్రం సరిపోదని భావించారు.. తన ఫ్యాన్స్ వల్ల అవ్వదని గ్రహించారో తెలియదు కానీ… వారితోపాటు కొత్తగా ఇతర హీరోల అభిమానులను దువ్వడం మొదలుపెట్టారు.
వారాహి యాత్రలో భాగంగా కోనసీమలో పర్యటిస్తున్న పవర్ స్టార్, జనసేన చీఫ్ పవన్ కల్యాణ్ కీలక వ్యాఖ్యలు చేశారు. తనకంటే ప్రభాస్, మహేశ్ చాలా పెద్ద హీరోలు అని అన్నారు. వీళ్లతో పాటు జూనియర్ ఎన్టీఆర్, రామ్ చరణ్, అల్లు అర్జున్ కూడా పాన్ ఇండియా హీరోలని అన్నారు. తనకంటే వాళ్ల రెమ్యునరేషన్ కూడా చాలా ఎక్కువేనని.. వాళ్లు తనకంటే చాలా పెద్ద స్టార్లు చెప్పుకోవడానికి తనకు ఏమాత్రం అభ్యంతరం లేదని.. ఉన్న విషయమే తాను చెబుతున్నానని పవన్ స్పష్టం చేశారు.
అయితే… రాజకీయాల్లో మాత్రం వాళ్లందరి కంటే తనకే ఎక్కువ అవగాహన ఉందని, ఈ క్రమంలోనే రాష్ట్రాభివృద్ధి కోసం వారంతా కలిసి రావాలని పవన్ పిలుపునిచ్చారు. ఫలితంగా… అందరి హీరోల అభిమానులు తనకే ఓటేయాలని పరోక్షంగా కోరారు. అది అసలు పాయింట్. అయితే ఈ విషయాలపై ఇతర హీరోల అభిమానులు కూడా అదే రీతిలో రియాక్ట్ అవుతున్నారు.
ఆన్ లైన్ వేదికగా స్పందిస్తున్న ఇతర హీరోల ఫ్యాన్స్… ముందుగా పవన్ తన అభిమానులతో ఓటు వేయించుకోవాలని సూచిస్తున్నారు. ఆయనకు తన అభిమానులే ఓట్లు వేయడం లేదన్న మాట పవనే స్వయంగా చెప్పిన విషయాన్ని గుర్తుచేస్తున్నారు. ఇదే సమయంలో తమ అభిమానులను కంట్రోల్ లో పెట్టుకోవాలని.. ఇతర హీరోలపై ట్రోలింగ్ లు చేయడం ఆపించాలని పవన్ కళ్యాణ్ కు సూచిస్తున్నారు.
ఏది ఏమైనా… ఫ్యాన్స్ పరంగా చూసుకుంటే పవన్ ఫ్యాన్స్ కి పూర్తి క్రమశిక్షణ తక్కువని, అందులో పవన్ పాత్ర కూడా పరోక్షంగా ఉందని ఇండస్ట్రీలో ఒక అపవాదు ఉంది. దానికి బలం చేకూరుస్తూనే పవన్ ఫ్యాన్స్ కూడా ఆడియో ఫంక్షన్స్ వేదికగా రచ్చ రచ్చ చేస్తుంటారు. ఆఖరికి ఇతర హీరోల ఆడియో ఫంక్షన్స్ లో కూడా దూరి.. స్టేజిపై ఉన్న హీరోలను పవన్ పేరు చెప్పమని డిమాండ్ చేస్తుంటారు. దీనిపై కొంతమంది హీరోలు… “నేను చెప్పను బ్రదర్” అని కూడా మొఖం మీదే అనేస్తుంటారు.
ఈ సమయంలో ఓట్ల కోసం పవన్ ఈస్థాయిలో ఇతర స్టార్స్ ఫ్యాన్స్ ని రిక్వస్టులు చేసుకోవడంపై భిన్నాభిప్రాయాలు వెలువడుతున్నాయి. అందరికీ నమ్మకం కలిగించేలా, ఎవరి పల్లకీ మోయకుండా నికార్సుగా నడుచుకుంటే నడుచుకుంటే పవన్ ఎవరినీ రిక్వస్ట్ చేసుకోవాల్సిన అవసరం లేదని.. వారే గ్రహించి ఓట్లు వేస్తారని అంటున్నారు. అలాకాని పక్షంలో పూటకోమాట ఊరుకో పాట పాడుతుంటే… సొంత ఫ్యాన్స్ కూడా ఓటు వేయరని, 2019లో జరిగిన విషయాన్ని ఒకసారి సృరణకు తెచ్చుకోవాలని సూచిస్తున్నారు.