సిగరెట్ తాగొద్దన్న భార్య కంట్లో కత్తితో పొడిచాడు ఓ దుర్మార్గుడు. కర్ణాటకలోని కృష్ణరాజపురం సమీపంలోని బాణసవాడిలో ఈ దారుణం జరిగింది. ధర్మ, గాయత్రి దంపతులు, వీరికి ఇద్దరు పిల్లలు. ధర్మ గత కొంత కాలంగా దురలవాట్లకు బానిసయ్యాడు. బాగా మందు, సిగరెట్లు తాగేవాడు. దీంతో ధర్మ అనారోగ్యానికి గురయ్యాడు. వైద్యులకు చూపించగా శాశ్వతంగా సిగరెట్లు మానేయాలని సూచించారు.
అయినా వినకుండా ధర్మ సిగరెట్లు తాగుతున్నాడు. ఇంట్లో ధర్మ సిగరెట్టు తాగుతుండగా గాయత్రి అడ్డుకుంది. దీంతో కోపోద్రిక్తుడైన ధర్మ ఇంట్లో ఉన్న కత్తితో గాయత్రి మీద దాడిచేయబోగా అది ఆమె కంట్లో కుచ్చుకుంది. దీంతో గాయత్రి ఇంట్లో నుంచి అరుస్తూ బయటికి రాగా స్థానికులు గమనించి ఆమెను ఆస్పత్రికి తరలించారు. బాణసవాడి పోలీసులు కేసు నమోదు చేసి దర్యాప్తు చేస్తున్నారు.