టాలీవుడ్‌లో ఎవ‌రిని క‌దిలించినా ఒకే మాట వినిపిస్తోంది.. పాన్ ఇండియా.. పాన్ ఇండియా.. స్టార్ హీరోల నుంచి యంగ్ హీరోల వ‌ర‌కు ప్రస్తుతం ఇదే పేరుని జ‌పిస్తున్నారు. తెలుగులో ఇప్ప‌టికే `ఆర్ ఆర్ ఆర్`, అల్లు అర్జున్ `పుష్ప`, ప్ర‌భాస్ న‌టిస్తున్న `జాన్‌` చిత్రాలు పాన్ ఇండియా స్థాయి చిత్రాలుగా రూపొందుతున్నాయి.
ఇదిలా వుంటే యంగ్ హీరో నిఖిల్ తన సినిమా కూడా పాన్ ఇండియా స్థాయి చిత్ర‌మే అంటున్నాడు. నిఖిల్ హీరోగా న‌టిస్తున్న చిత్రం `కార్తికేయ 2`. చందూ మొండేటి ద‌ర్శ‌క‌త్వం వ‌హిస్తున్న ఈ చిత్రాన్ని దేశ వ్యాప్తంగా వున్న మిస్ట‌రీ ఆల‌యాల నేప‌థ్యంలో రూపొందించ‌బోతున్నారు. కాశీ నుంచి క‌న్యాకుమారి వ‌ర‌కు వున్న ప్ర‌ధాన ఆల‌యాల నేథ్యంలో ఆద్యంత ఆస‌క్తిక‌రంగా ఈ సినిమా సాగ‌నుంద‌ట.
తెలుగుతో పాటు త‌మిళ, మ‌ల‌యాళ, క‌న్న‌డ, హిందీ భాష‌ల్లో ఈ చిత్రాన్ని రిలీజ్ చేయ‌బోతున్నారు. ఈ వెర్ష‌న్‌ల‌కు నిఖిల్ తన పాత్ర‌కు తానే డ‌బ్బింగ్ చెప్పుకోబోతున్నాడ‌ట. ఎన్టీఆర్ `ఆర్ ఆర్ ఆర్` టీజ‌ర్‌కు చెప్పిన‌ట్టే త‌ను చెప్పుకోవాల‌ని వుంద‌ని చెబుతూ పాన్ ఇండియా జ‌పం చేస్తున్నాడు.