తెలంగాణ ముఖ్యమంత్రి రేవంత్ రెడ్డి మరోసారి ప్రధానమంత్రి నరేంద్ర మోదీని కలిశారు. సీఎంగా బాధ్యతలు చేపట్టిన తర్వాత మోదీతో భేటీ కావడం ఇది మూడోసారి కావడం విశేషం. ఈ సమావేశానికి ఐటీ, పరిశ్రమల శాఖ మంత్రి శ్రీధర్ బాబు, రాష్ట్ర ఉన్నతాధికారులు హాజరయ్యారు. రాష్ట్ర ప్రగతికి సంబంధించి అనేక కీలక అంశాలను రేవంత్ ప్రధాని ముందు ఉంచినట్లు సమాచారం.
ఈ భేటీలో ఎస్ఎల్బీసీ టన్నెల్ ప్రమాదంపై ప్రధానికి వివరించారు. ప్రమాదంలో చిక్కుకున్న 8 మంది కార్మికులను కాపాడేందుకు కేంద్రం సహకారం కావాలని విజ్ఞప్తి చేశారు. సహాయక చర్యలు వేగవంతం చేయాలని కోరారు. తెలంగాణ ప్రభుత్వానికి తగిన విధంగా సహాయం అందించాలని రేవంత్ ప్రధానికి వివరించారు.
అంతేకాకుండా, రాష్ట్రంలోని బీసీ కుల గణన, ఎస్సీ వర్గీకరణ అంశాలపై ప్రధాని దృష్టిని ఆకర్షించినట్లు తెలుస్తోంది. తెలంగాణకు ప్రత్యేక నిధులు, పెండింగ్ ప్రాజెక్టుల ఆమోదం కోసం రేవంత్ ప్రధానికి విజ్ఞప్తి చేశారు. విభజన హామీలను పూర్తి చేయాల్సిన అవసరాన్ని వివరించారు. కేంద్రం నుంచి రాష్ట్రానికి రావాల్సిన నిధులను వెంటనే విడుదల చేయాలని కోరారు.
మొత్తానికి, రేవంత్ మోదీ భేటీ రాష్ట్ర రాజకీయ వర్గాల్లో ఆసక్తికరంగా మారింది. తెలంగాణకు కేంద్రం నుంచి ఎంత వరకు మద్దతు లభిస్తుందనేది ఇప్పుడు చర్చనీయాంశంగా మారింది. రేవంత్ విజ్ఞప్తులకు మోదీ ఎలా స్పందించారనేదే కీలకం. మరి, ఈ భేటీ రాష్ట్రానికి ఏ మేరకు ఉపయోగపడుతుందో చూడాలి!
