మద్యం ప్రియులకు తెలంగాణ ప్రభుత్వం మరోసారి చేదు వార్త అందించింది. ఇప్పటికే బీర్ల ధరలు పెరిగిన సంగతి మరవకముందే… ఇప్పుడు మద్యం ధరల పెంపుతో మందుబాబులపై అదనపు భారం పడనుంది. రాష్ట్ర ఎక్సైజ్ శాఖ తాజా ఉత్తర్వుల ప్రకారం, క్వార్టర్ బాటిల్‌పై రూ.10, హాఫ్ బాటిల్‌పై రూ.20, ఫుల్ బాటిల్‌పై రూ.40 పెరిగింది. దీంతో ఇప్పటికే ఖరీదైన మద్యం మరింత ఖరీదైనది అవుతోంది.
ఈ ధరల పెంపుతో ప్రభుత్వ ఖజానాకు గణనీయమైన ఆదాయం వచ్చే అవకాశం ఉంది. అధికార లెక్కల ప్రకారం, ఈ ధరల మార్పుల వల్ల రాష్ట్రానికి నెలకు రూ.160 కోట్లు అదనంగా వచ్చే అవకాశముందని అంచనా. ఇది ఏడాదికి సుమారు రూ.1,900 కోట్ల అదనపు ఆదాయాన్ని చేస్తుంది. ప్రభుత్వం ఆర్థిక లోటు భర్తీ, సంక్షేమ పథకాలకు నిధుల సమీకరణ కోణంలో ఈ నిర్ణయం తీసుకున్నట్లు తెలుస్తోంది.
అయితే, చీప్ లిక్కర్ ధరను మాత్రం ఈసారి ప్రభుత్వం యథాతథంగా ఉంచింది. ఇందుకు నిపుణుల విశ్లేషణ ఏమిటంటే… ఈ విభాగానికి చెందిన వినియోగదారులు ఎక్కువగా దిగువస్థాయి ప్రజలే కావడం వల్ల, వారికి భారం కాకుండా చూడడమే ఈ నిర్ణయానికి వెనుక ఉన్న ఆలోచన. అయినా మద్యం ధరల పెంపుతో మద్య విభాగం మొత్తం మీద వినియోగం ప్రభావితమయ్యే అవకాశాలు ఉన్నాయని అంటున్నారు. మరోవైపు సామాజికంగా కూడా ఈ ధరల పెంపు చర్చనీయాంశంగా మారింది.