ఆంధ్రప్రదేశ్ వ్యాప్తంగా జరిగిన జెడ్పీటీసీ, ఎంపీటీసీ ఎన్నికల్లో ఎన్డీయే కూటమి క్లీన్ స్వీప్ దిశగా దూసుకుపోతున్న వేళ, చిత్తూరు జిల్లా తిరుపతి రూరల్ జెడ్పీటీసీ స్థానంలో మాత్రం ఊహించని రాజకీయ సంచలనం నమోదైంది. అత్యంత ప్రతిష్టాత్మకమైన ఈ స్థానాన్ని వైఎస్సార్ కాంగ్రెస్ పార్టీ అభ్యర్థి, మాజీ ఎమ్మెల్యే చెవిరెడ్డి భాస్కర్ రెడ్డి చిన్న కుమారుడు చెవిరెడ్డి హర్షిత్ రెడ్డి కైవసం చేసుకున్నారు. దాదాపు లక్షా 60 వేల మంది ఓటర్లు ఉన్న ఈ భారీ జెడ్పీటీసీ స్థానంలో కూటమి తరఫున పోటీ చేసిన తెలుగుదేశం పార్టీ అభ్యర్థి ధనలక్ష్మిపై, చెవిరెడ్డి హర్షిత్ రెడ్డి 602 ఓట్ల స్వల్ప తేడాతో సంచలన విజయం సాధించారు.
కూటమి అధికారంలో ఉన్నప్పటికీ, సిట్టింగ్ నియోజకవర్గంలో ఈ స్థానాన్ని కోల్పోవడం టీడీపీ శ్రేణులను తీవ్ర దిగ్భ్రాంతికి గురిచేసింది. ఈ ఘోర పరాజయానికి చంద్రగిరి కూటమి ఎమ్మెల్యే పులివర్తి నానిపై క్షేత్రస్థాయిలో ఉన్న తీవ్ర ప్రజా వ్యతిరేకతే ప్రధాన కారణమని విశ్లేషకులు స్పష్టం చేస్తున్నారు. సోషల్ మీడియా ప్లాట్‌ఫారమ్స్‌లో పులివర్తి నాని వర్గీయులు భారీ ఎలివేషన్లు ఇస్తూ, అంతా బాగుందనే కలరింగ్ ఇస్తున్నప్పటికీ.. వాస్తవ పరిస్థితులు మాత్రం దానికి పూర్తిగా భిన్నంగా ఉన్నాయని ఈ తీర్పు నిరూపించింది.
ఎమ్మెల్యేగా గెలిచిన రెండున్నరేళ్ల కాలంలో నియోజకవర్గంలో పెరిగిన ప్రజా వ్యతిరేకతను, స్థానిక లీడర్ల వైఫల్యాలను కప్పిపుచ్చుకోవడానికి సోషల్ మీడియా పబ్లిసిటీని నమ్ముకున్నారని, కానీ పల్లెల్లోని ఓటర్లు మాత్రం నిశ్శబ్దంగా తమ అసంతృప్తిని ఓటు రూపంలో చూపించారని అర్థమవుతోంది. తిరుపతి రూరల్ పరిధిలో అభివృద్ధి పనుల నిర్లక్ష్యం, కేడర్ మధ్య పెరిగిన అంతర్గత విబేధాలు కూటమి కొంపముంచాయి. దీనికి తోడు ఎన్నికల ఫలితాల అనంతరం పులివర్తి నాని సతీమణి సుధారెడ్డి మీడియా ముందు చేసిన వ్యాఖ్యలు మరింత చర్చనీయాంశంగా మారాయి.
కౌంటింగ్ ప్రక్రియలో అక్రమాలు జరిగాయని, తాము రీకౌంటింగ్ కోరదామని అనుకున్నప్పటికీ.. “ఈ ఎన్నికల్లోనూ ఓడిపోతే డిప్రెషన్ లోకి వెళ్తామని” చెవిరెడ్డి భాస్కర్ రెడ్డి కుటుంబ సభ్యులు బతిమాలడంతోనే తాము మానవతా దృక్పథంతో వదిలేశామంటూ ఆమె చేసిన వ్యాఖ్యలపై విమర్శలు వస్తున్నాయి. కేవలం సోషల్ మీడియా హైప్ తో పాలిటిక్స్ నడపలేరని, క్షేత్రస్థాయి వ్యతిరేకతను ఇప్పటికైనా ఎమ్మెల్యే పులివర్తి నాని గుర్తించి సరిదిద్దుకోకపోతే రాబోయే పంచాయతీ ఎన్నికల్లో చంద్రగిరి నియోజకవర్గంలో కూటమికి మరింత భారీ పతనం తప్పదని పొలిటికల్ అనలిస్టులు హెచ్చరిస్తున్నారు.