ఆంధ్రప్రదేశ్ రాజకీయాల్లో ఒకప్పుడు వైఎస్సార్ కాంగ్రెస్ పార్టీ హయాంలో సజ్జల రామకృష్ణారెడ్డిని చూసి విపక్షాలు ‘సకల శాఖా మంత్రి’ అని తెగ విమర్శించేవి. ఏ శాఖలో ఏం జరిగినా, ప్రెస్ మీట్ పెట్టాలన్నా, పాలనాపరమైన నిర్ణయాలు తీసుకోవాలన్నా సజ్జల జోక్యమే ప్రధానంగా ఉండేది. అయితే కాలం మారింది.. కూటమి ప్రభుత్వం అధికారంలోకి వచ్చింది. కానీ, సీన్ మాత్రం అస్సలు మారలేదు. నాడు తాడేపల్లిలో సజ్జల పోషించిన అదే ‘సకల శాఖా’ పాత్రను, నేడు అమరావతిలో ఐటీ మరియు పరిశ్రమల శాఖ మంత్రి నారా లోకేష్ భుజాన వేసుకున్నారనే టాక్ సచివాలయ వర్గాల్లో గట్టిగా వినిపిస్తోంది.
లోకేష్ స్పీడ్ చూస్తుంటే.. కూటమి ప్రభుత్వంలో మిగిలిన మంత్రులంతా కేవలం ‘డమ్మీలు’ మాత్రమేనా అనే రేంజ్ వెటకారం పొలిటికల్ సర్కిల్స్లో నడుస్తోంది. ప్రస్తుతం ప్రభుత్వంలో ఏ కీలక పరిణామం చూసినా అక్కడ చిన్నబాబే ప్రత్యక్షమవుతున్నారు. లోకేష్ చేతిలో ఉన్నవి ఐటీ, పరిశ్రమల శాఖలే అయినప్పటికీ.. ఆయన మాత్రం అన్ని శాఖల ఫైళ్లను తన టేబుల్ పైకి తెప్పించుకుంటున్నారనే గుసగుసలు వినిపిస్తున్నాయి. ఉదాహరణకు, రెవెన్యూ మరియు గ్రామీణాభివృద్ధి శాఖల పరిధిలోకి వచ్చే ‘కొత్త పెన్షన్ల’ పంపిణీ వ్యవహారంపై లోకేష్ నేరుగా మంత్రుల బ్రేక్ఫాస్ట్ మీటింగ్లో దిశా నిర్దేశం చేయడం హాట్ టాపిక్గా మారింది.
అటు పరిశ్రమలను రాష్ట్రానికి రప్పించే విషయంలో కాకినాడ హ్యుందాయ్ ప్రాజెక్ట్ లాంటి మెగా డీల్స్ను ఆయనే ఒంటిచేత్తో హ్యాండిల్ చేస్తున్నారు. విద్యా శాఖ విషయాలు, వైద్య రంగంలో లోపాలు, అధికారుల పనితీరును సమీక్షించడం, చివరకు మాట వినని ఐఏఎస్, ఐపీఎస్ అధికారులకు వార్నింగ్లు ఇవ్వడం కూడా లోకేషే చూసుకుంటున్నారు. దీంతో సంబంధిత శాఖల మంత్రులు సైతం “మా శాఖల్లో ఏం జరుగుతుందో చిన్నబాబు ప్రెస్ మీట్ పెడితే గానీ మాకు తెలియడం లేదు” అంటూ అంతర్గతంగా నవ్వుకుంటున్నారట.
నిజానికి నారా లోకేష్ చూపిస్తున్న ఈ అతి ఉత్సాహం, సర్వశాఖల జోక్యం వెనుక ‘భవిష్యత్తు ముఖ్యమంత్రి’ కలరింగ్ ఉందనేది జగమెరిగిన సత్యం. చంద్రబాబు నాయుడు సీనియర్ మంత్రులను పక్కనబెట్టి, లోకేష్కే పూర్తి పగ్గాలు అప్పగించడంతో.. చిన్నబాబు కూడా ప్రతి విషయంలో తానే లైమ్లైట్లోకి రావాలని తాపత్రయపడుతున్నారు. నాడు సజ్జల మితిమీరిన జోక్యం వల్లే వైసిపి సీనియర్లు రగిలిపోయి, చివరకు పార్టీ పతనానికి దారితీసిందని నెటిజన్లు గుర్తుచేస్తున్నారు. మరి ఇప్పుడు లోకేష్ కూడా అదే బాటలో ప్రయాణిస్తూ ‘సూపర్ మినిస్టర్’ అవతారమెత్తడం కూటమిలోని మిగిలిన సీనియర్ మంత్రులకు ఎంతవరకు మింగుడుపడుతుందో.. రాబోయే రోజుల్లో ఈ ‘సకల శాఖా’ వ్యూహం ఎలాంటి ఫలితాలను ఇస్తుందో చూడాలి.