కృష్ణా జిల్లా రాజకీయాలకు కేరాఫ్ అడ్రస్ అయిన బందరు (మచిలీపట్నం) నియోజకవర్గంలో కూటమి నేతల మధ్య అంతర్గత పోరు ఇప్పుడు బహిర్గతమైంది. రాబోయే మున్సిపల్ ఎన్నికలను దృష్టిలో పెట్టుకుని మచిలీపట్నం మున్సిపాలిటీ పై పట్టు సాధించేందుకు మచిలీపట్నం జనసేన ఎంపీ వల్లభనేని బాలసౌరి వర్గానికి, స్థానిక జనసేన కీలక నేతలు మరియు టీడీపీ తమ్ముళ్లకు మధ్య పచ్చగడ్డి వేస్తే భగ్గుమనేలా కోల్డ్ వార్ నడుస్తోంది. అధినేతలు చంద్రబాబు, పవన్ కల్యాణ్లు పైకి అంతా ఒకటే అంటున్నా.. క్షేత్రస్థాయిలో మాత్రం సీట్ల కోసం తమ్ముళ్లు, జనసైనికులు ఒకరిపై ఒకరు కత్తులు నూరుకుంటున్నారు.
ఈ వివాదానికి ప్రధాన కారణం.. బందరు మున్సిపాలిటీని ఎలాగైనా తమ ఖాతాలోనే వేసుకోవాలని ఇరు పార్టీల లీడర్లు పట్టుబట్టడమే. మచిలీపట్నం పార్లమెంట్ స్థానం నుంచి జనసేన తరఫున గెలిచిన వల్లభనేని బాలసౌరి.. బందరు మున్సిపాలిటీపై తన పట్టును నిలుపుకోవాలని చూస్తున్నారు. అయితే, ఇక్కడ అసలు ట్విస్ట్ ఏంటంటే.. బందరు అసెంబ్లీ పరిధిలో టీడీపీకి బలమైన క్యాడర్ ఉండటంతో ఆ పీఠం దేశం పార్టీకే కేటాయించాలని ఎంపీ గారు సహా, కొందరు డిమాండ్ చేస్తుంటే, జనసేనలోని స్థానిక పాత లీడర్లు మాత్రం.. ఎంపీ బాలసౌరి వర్గానికి కాకుండా మున్సిపాలిటీని తమకు ఇవ్వాలంటూ సొంత పార్టీ ఎంపీపైనే తిరుగుబావుటా ఎగురవేస్తున్నారు.
ఈ సీట్ల లొల్లి కాస్తా ఇప్పుడు వ్యక్తిగత ఆధిపత్య పోరుగా మారి, ‘ఎంపీ బాలసౌరి వర్సెస్ లోకల్ జనసేన’గా రూపాంతరం చెందింది. నియోజకవర్గంలో జరిగే ప్రభుత్వ కార్యక్రమాల్లో, అధికారిక సమావేశాల్లో ప్రోటోకాల్ విషయంలో కూడా ఇరు వర్గాల మధ్య తీవ్రమైన కోల్డ్ వార్ నడుస్తున్నట్లు భోగట్టా. ఎంపీ బాలసౌరి వైఎస్సార్సీపీ నుంచి వచ్చి జనసేనలో చేరినందున.. ఆయన ఒంటెద్దు పోకడలకు పోతున్నారని, క్షేత్రస్థాయిలో ఉన్న పాత జనసేన క్యాడర్ను పక్కనబెడుతున్నారని స్థానిక తమ్ముళ్లు, జనసైనికులు అంతర్గతంగా మండిపడుతున్నారు.
ప్రస్తుత పరిస్థితి ఆధారంగా చెప్పాలంటే.. ఈ ‘బందరు మున్సిపల్ ముఠాపోరు’ రాబోయే రోజుల్లో కూటమికి పెద్ద తలనొప్పిగా మారేలా కనిపిస్తోంది. క్షేత్రస్థాయిలో సొంత పార్టీ ఎంపీ వర్సెస్ లోకల్ లీడర్ల మధ్య సాగుతున్న ఈ పంచాయితీ కూటమి గ్రాఫ్ను దెబ్బతీసే ప్రమాదం ఉందని రాజకీయ విశ్లేషకులు హెచ్చరిస్తున్నారు. మరి ఈ మున్సిపల్ పీఠాన్ని జనసేన ఎంపీ బాలసౌరి దక్కించుకుంటారా.. లేక లోకల్ లీడర్స్ హవా నడవనుందా అనేది తెలియాలంటే అధిష్ఠానం పెద్దలు ఈ పంచాయితీని ఎప్పుడు సెటిల్ చేస్తారో చూడాలి.