YSRCP’s Sincere Suggession : మాట కొంచెం ఘాటుగా వున్నా, వైఎస్సార్ కాంగ్రెస్ పార్టీ నేతల నుంచి జనసేన పార్టీ అధినేతకు ఓ విలువైన సలహానే వస్తోంది. ఆ సలహాని, సూచనని జనసేన అధినేత హుందాగా స్వీకరిస్తే.. జనసేన పార్టీ ఆంధ్రప్రదేశ్ రాష్ట్రంలో రాజకీయంగా ఎదిగేందుకు ఆస్కారముంటుంది.
అసలు జనసేన పార్టీకి సలహాలు, సూచనలు చేయాల్సిన అవసరం వైసీపీకి ఏముంటుంది.? నిజానికి జనసేనతోనే వైసీపీకి ఎక్కువ ప్రమాదం. అయినాగానీ, కాస్త మంచి రాజకీయాలు నడవాలంటే ఆంధ్రప్రదేశ్ రాష్ట్రంలో టీడీపీ వుండకూడదన్నది వైసీపీ వాదన.
సరే, అందులో ఎంత వాస్తవం వుందన్నది వేరే చర్చ.
జనసేన పార్టీ సింగిల్గా పోటీ చేసి ఓ పాతికో ముప్ఫయ్యో సీట్లు తెచ్చుకుంటే, ఆంధ్రప్రదేశ్ అసెంబ్లీలో మాకు గట్టి పోటీ వుంటుందంటూ వైసీపీ నేత ఒకరు వ్యాఖ్యానిస్తున్నారు. ‘టీడీపీ ఎలాగూ అసెంబ్లీని గౌరవించదు.
ఆ పార్టీ అసెంబ్లీలోకి రావాలని మేమెందుకు కోరుకుంటాం.?’ అన్నది వైసీపీ వాదన.
2019 ఎన్నికల్లో జనసేన పార్టీ ఓటు బ్యాంకు 10 శాతం కూడా లేదు. కానీ, జనసేనకు ఓటు బ్యాంకు గణనీయంగానే పెరిగిందన్నది పలు సర్వేలు చెబుతున్న విషయం. ఇలాంటి పరిస్థితుల్లో టీడీపీ – జనసేన కలిస్తే.. టీడీపీ బలపడిపోతుందనే ఆలోచన అయితే వైసీపీలో లేదు.
కానీ, జనసేన నష్టపోతుందనే ఆవేదన అయితే వైసీపీలో కనిపిస్తోంది.
టీడీపీతోపాటు జనసేన కూడా వైసీపీకి రాజకీయ శతృవే. కానీ, జనసేనతో వైసీపీ శతృత్వం ఇంకోలా వుంటుంది. ఏమో, ఈ రాజకీయ సూచనలు, సలహాల వ్యవహారమేమోగానీ.. వైసీపీకి జనసేన ప్రతిపక్షమైతే రాజకీయాల్లో ముమ్మాటికీ ఒకింత పాజిటివ్ స్టఫ్ వుంటుందన్నది నిర్వివాదాంశం.