‘మా పార్టీకి కార్యకర్తలే నాయకులు..’ అంటున్నారు జనసేన ముఖ్య నేత నాగబాబు. ఉత్తరాంధ్ర పర్యటనలో భాగంగా జనసేన పార్టీకి చెందిన నేతలు, కార్యకర్తలతో నాగబాబు నిన్న సమావేశమైన సంగతి తెలిసిందే. ఈ సమావేశంలో జనసేన శ్రేణులు ఉత్సాహంగా పాల్గొన్నాయి.
జనసేన పార్టీలో పని చేసే కార్యకర్తల్లో చిత్తశుద్ధి వుందనీ, కింది స్థాయి నుంచి జనసైనికులు క్రమక్రమంగా రాజకీయంగా ఎదుగుతున్నారనీ, మేధావి వర్గం జనసేనలో కీలక భూమిక పోషిస్తోందనీ నాగబాబు చెప్పారు. డబ్బులు పంచి రాజకీయాలు చేయాలని జనసేన ఎప్పుడూ అనుకోలేదనీ, అందుకే జనసేన కోరుకుంటోన్న మార్పుకి కాస్త సమయం పడుతుందని నాగబాబు చెప్పడం గమనార్హం.
జనసేన పార్టీకి గ్రామ స్థాయిలో బలం వుందనీ నాగబాబు చెప్పారు. మంచి విషయమే. జనసేన పార్టీకి కింది స్థాయిలో బలం వున్నమాట నిజమే అయితే, బలమైన నాయకులెక్కడ.? 2014 ఎన్నికల సమయంలో జనసేన పార్టీ పుట్టింది. మొత్తంగా ఎనిమిదేళ్ళు దాటింది జనసేన ఆవిర్భవించి. అప్పటికీ ఇప్పటికీ జనసేనలో ఏం మారిందని.?
అదే పవన్ కళ్యాణ్ చుట్టూ రాజకీయాలు జరుగుతుంటాయి. నాదెండ్ల మనోహర్ తప్ప, పార్టీలో మరో ముఖ్య నాయకుడు కనిపించని పరిస్థితి. జిల్లాల వారీగా, నియోజకవర్గాల వారీగా నేతలున్నా, కీలకమైన అంశాలపై చర్చ అనేసరికి, అవగాహనా రాహిత్యం కనిపిస్తోంది.
రాజకీయాల్లో రాజకీయాలే చేయాలి. కానీ, అలాంటి రాజకీయాలు చేయడంలో జనసేన నాయకత్వానికి అనుభవరాహిత్యం స్పష్టంగా కనిపిస్తోంది. అంతిమంగా రాజకీయమంటే నెంబర్ల గేమ్. ఈ నెంబర్ల రేసులో జనసేన వెనుకబడిపోతోంది.