ప్రస్తుతం తెలంగాణలో గ్రేటర్ ఎన్నికలే హాట్ టాపిక్. చలికాలంలోనూ రాజకీయాలు తెగ వేడెక్కాయి. ప్రధాన పార్టీలన్నీ ప్రచారంలో మునిగాయి. ఎవరిని దించితే ఓటర్లు ఆకర్షితులవుతారో.. వాళ్లనే పార్టీలు దింపుతున్నాయి. ప్రచారం చేయిస్తున్నాయి.
అయితే.. ఈ సారి గ్రేటర్ ఎన్నికల్లో పోటీ చేస్తున్న టీడీపీకి తన ప్రచారాన్ని ముమ్మరం చేసింది. ఇప్పటికే తెలంగాణకు చెందిన టీడీపీ నాయకులు గ్రేటర్ ఎన్నికల ప్రచారంలో పాల్గొంటున్నా.. అది సరిపోవడం లేదు. జనాలు ఎవ్వరూ టీడీపీ మాట వినడం లేదు. దీంతో ఏం చేయాలో తెలియక తల పట్టుకొని కూర్చున్నారు తెలంగాణ టీడీపీ నేతలు.
అన్ని సీట్లలో కాకున్నా.. దాదాపు సగానికి పైగా సీట్లలో ఈసారి టీడీపీ పోటీ చేసింది. దానికి తగ్గ ప్రచారం చేస్తేనే కొన్ని సీట్లు అయినా గెలిచే అవకాశం ఉంది. పార్టీ జాతీయ అధ్యక్షుడు చంద్రబాబు హైదరాబాద్ లో ప్రచారం చేయరు. ఆయన ఈ ఎన్నికల ప్రచారంలో పాల్గొనరు. లోకేశ్ కూడా రావట్లేదు అని అంటున్నారు. బాలకృష్ణ కూడా ప్రచారం చేయరని తెలుస్తోంది.
వీళ్లెవరూ రాకుంటే ఎన్నికల ప్రచారం ఎలా? అని అనుకుంటన్నవేళ… ఈసారి స్టార్ హీరోను ఎన్నికల ప్రచారం కోసం దింపాలని టీడీపీ యోచిస్తోందట. దానికోసం తెలుగు హీరో కళ్యాణ్ రామ్ ను బరిలో దించనున్నారట. బాలకృష్ణ కోరిక మేరకు కళ్యాణ్ రామ్ ఈసారి గ్రేటర్ ఎన్నికల్లో ప్రచారం చేస్తారని టాక్ వినిపిస్తోంది. అయితే.. కళ్యాణ్ రామ్ గ్రేటర్ ఎన్నికల ప్రచారంపై ఇప్పటి వరకు అధికారిక సమాచారం అయితే రాలేదు.