Pawan Kalyan : ‘రిపబ్లిక్’ సినిమా ప్రీ రిలీజ్ ఈవెంట్ గుర్తుందా.? ఆ ఈవెంట్కి ముఖ్య అతిథిగా హాజరైన పవన్ కళ్యాణ్, రాజకీయ పరమైన విమర్శలు చేశారు.. అది కాస్తా పెను వివాదమైంది. అప్పటికీ, ఇప్పటికీ ఏమీ మారలేదు.. కానీ, ‘భీమ్లానాయక్’ సినిమా ప్రీ రిలీజ్ ఈవెంట్ సందర్భంగా అత్యంత వ్యూహాత్మకంగా వ్యవహరించారు పవన్ కళ్యాణ్.
పవన్ కళ్యాణ్ చాలా సింపుల్గా ప్రసంగాన్ని పూర్తి చేసేశారు. ఎక్కడా విమర్శలకు తావివ్వలేదు. కానీ, పవన్ కళ్యాణ్ గురించి ఆ కార్యక్రమానికి హాజరైన ప్రతి ఒక్కరూ చాలా చాలా ప్రత్యేకంగా మాట్లాడారు. అయితే, ఎవరూ ఓవర్ ది బోర్డ్ వెళ్ళకపోవడం గమనార్హం.
సాధారణంగా పవన్ కళ్యాణ్ సినిమా ఫంక్షన్లలో బండ్ల గణేష్ లాంటివారి అతి ఎక్కువగా కనిపిస్తుంటుంది. కానీ, ఇక్కడ అలాంటి ‘అతి’ ఏమీ లేకుండా పోయింది. నిజానికి, పవన్ అభిమానులూ చాలా చాలా బాధ్యతగా వ్యవహరించడం మరో ఆసక్తికరమైన విషయమిక్కడ.
మంత్రి కేటీయార్ ప్రసంగానికి అడ్డు తగల్లేదు.. ఎవరి ప్రసంగాల్నీ అడ్డగించేలా నినాదాలు చేయలేదు. చూస్తోంటే, ముందస్తుగా ప్లాన్ చేసుకునే.. సభను అత్యంత వ్యూహాత్మకంగా విజయవంతంగా ‘భీమ్లానాయక్’ టీమ్ నిర్వహించిందని అనుకోవాలి.
ఇంతలా పవన్ కళ్యాణ్లో ఈ ప్రత్యేకమైన మార్పుకి కారణమేంటి.? అంటే, దానికి సంబంధించి భిన్న వాదనలు వినిపిస్తున్నాయి. ఏపీలో సినీ పరిశ్రమ విషయమై నెలకొన్న గందరగోళం సహా పలు అంశాలు పవన్ కళ్యాణ్ వ్యూహాత్మకంగా వ్యవహరించేలా చేశాయంటున్నారు.
ఒకవేళ పవన్ వివాదాస్పద వ్యాఖ్యలు ఏమైనా చేసి వుంటే, ఆంధ్రప్రదేశ్లో అవి పుట్టించే రాజకీయ కాక ఇంకో స్థాయిలో వుండేదేమో.!